Pakistanning xitayda turushluq bash elchisi Uyghur rayonidiki ziyaritide bingtüenning pa'aliyitige qatnashti

Uyghurlar mesiliside bashtin axir xitay terepte turuwatqan pakistan bilen xitayning iqtisadiy hemkarliqi küchiyiwatqan bir mezgilde, pakistanning xitayda turushluq bash elchisi xelil hashimi 6-ayning 25-künidin 30-künigiche ürümchi, qeshqer qatarliq jaylarda ziyaret bolghan, shundaqla 8-nöwetlik xitay-yawropa soda yermenkisining échilish murasimigha qatnashqan.

Pakistandiki “Közetküchi” torining xewiride éytilishiche, pakistan bash elchisi xelil hashimi Uyghur aptonom rayonluq hökümetning re'isi erkin tunyaz bilen söhbet ötküzüp, pakistan bilen xitay munasiwitining muhimliqi we “Shinjangning bu munasiwette köwrüklük rol oynaydighanliqi” ni alahide tekitligen.

Xelil hashimi pakistanning hazir xitaydiki 13 éksport shirkitining meblighini kirgüzüshke tirishiwatqanliqini, “Shinjangdiki karxanilarningmu pakistan'gha meblegh sélishi we pakistan karxaniliri bilen soda qilishi” ni qollaydighanliqini, bolupmu yéza igilik, toqumichiliq, kanchiliq we mal toshush saheliride hemkarlishishni ümid qilidighanliqini bildürgen.

U yene bingtüen orunliri uyushturghan “Échiwétilgen birleshme armiye” pa'aliyitige qatniship söz qilghan. Xelil hashimi sözide pakistanning mol tebi'iy shara'iti we adem küchi bayliqidin paydilinip, xitay bilen iqtisadiy hemkarliq pursitini dawamliq köpeytidighanliqini tekitligen. Xelil hashimi qeshqerdiki ziyaritide pakistan bilen xitayning chégrasi bolghan xunjirap éghizighiche barghan we u jaydiki chégra bashqurush, soda-tamozhna söhbetlirige qatnashqan.

Xewerlerdin melum bolghinidek, pakistan bash ministiri shehbaz sherif 6-ayning béshida xitayni ziyaret qilip, nurghun sahelerde “Sugha chiliship qélish” weziyitige giriptar boluwatqan “Xitay-pakistan iqtisad karidori” qurulushini qayta janlandurush üchün nechche on milyard dollarliq kélishim imzalashqa tirishqanidi. Xitayning qeshqerni muhim soda we sayahet rayoni qilip échishi, jümlidin qeshqerde erkin soda rayoni qurushi qatarliqlar “Xitay-pakistan iqtisad karidori” ni qayta échish we güllendürüsh bilen munasiwetlik dep qarilip kelmekte.