Pakistandiki xitaygha qarshi namayish tézdin toqunushqa aylinip ketti

“Roytérs agéntliqi” ning 29-iyuldiki xewiride éytilishiche, pakistanning gwadar shehride baluchistan küchlirining ikki kün dawam qilghan zor kölemlik namayishi tézdin toqunushqa aylinip ketken. Shuningdek namayishqa ishtirak qilghan baluchilarning sani shiddet bilen köpeygen. Namayishchilar birnechche kün burun hökümet terep qolgha alghan baluchistan kishilik hoquq pa'aliyetchilirini shertsiz qoyup bérishni telep qilghan.

Xewerde éytilishiche, baluchistan qoralliq küchlirige mayil kishiler bashlighan bu namayish pakistan saqchilirining zorluq küch bilen tosushigha uchrighandin kéyin namayishchilarning sépi tézdin kéngeygen. Namayishchilar asasliqi “Xitay-pakistan iqtisadi karidori” qurulushi peyda qilghan bir qatar kishilik hoquq mesililirige qarshi turushni nishan qilghan bolup, gwadar porti buningdiki eng asasliq nuqta bolghan. Bolupmu qeshqer bilen gwadar portini tutashturidighan zor qurulush pakistandiki “Ikkinchi derijilik puqra” dep qarilidighan baluchistan xelqi topliship olturaqlashqan jaylardin ötidighan bolup, ish pursitining baluchi xelqige bérilmesliki, muhitning bulghinishi qatarliqlar izchil yerlik xelqning naraziliqini qozghap kelgen.

Gwadar sheherlik saqchi idarisi tarqatqan uqturushta éytilishiche, namayishchilar saqchilar bilen toqunushush jeryanida pakistan armiyesidin bir esker ölüsh, on nechche kishi éghir yarilinish weqesi kélip chiqqan. “Baluchistan milliy yighilishi” ning mes'ulliri bolsa “Hökümet ötken üch künlük namayish jeryanida minggha yéqin kishini tutqun qildi” dégen. Melum bolushiche, gwadar shehiridiki namayish tézdin pakistanning bashqa jaylirigha kéngeygen. Xelq'ara kechürüm teshkilatining jenubiy asiya ishxanisi bu heqte bayanat élan qilip: “Pakistan hökümitining héchqandaq zörüriyet bolmighan ehwalda baluchistan namayishchilirigha qarshi qanunsiz halda armiyeni ishqa sélishi bizni bekmu endishige salmaqta” dégen.

Melum bolushiche, 60 nechche milyard amérika dolliri serp qilinish pilanlan'ghan “Xitay-pakistan iqtisadi karidori” qurulushi yéqinqi mezgillerde mebleghning emeliyleshmesliki tüpeylidin sugha chiliship qalghan. Shunga xitay we pakistan otturisida bu heqtiki söhbetler jiddiy dawam qilishqa bashlighanidi.