Хитай-пакистан иқтисадий каридори иқтисадий мүшкүлатта қалмақта

Мухбиримиз әзиз
2019-10-08
Елхәт
Пикир
Share
Принт

2015-Йилидин буян хитай-пакистан мунасивитидә, болупму пакистандики ахбарат саһәсидә асасий темилардин болуп келиватқан «хитай-пакистан иқтисадий каридори» ниң дағдуғилири нөвәттә барғансери хирәлишип меңиватқан болуп, бир қисим анализчилар бу һәқтә охшаш болмиған пикирләрни оттуриға қоймақта икән. Пакистанлиқ сиясий анализчи муһәммәд әкбәрниң «дипломат» журнилиниң 7-өктәбир санида елан қилинған бу һәқтики мақалиси әнә шуниң бири һесаблиниду.

Мақалида көрситилишичә, һазир бир қисим сиясий анализчилар хитай билән әмәс, бәлки америка билән болған мунасивәтни күчәйтиш һәққидә пикирләргә зеһин қоюшқа башлиған. Лекин һазирқи вәзийәттә пакистан һөкүмити хитайға бәкрәк тайинишқа мәҗбур болғачқа, һиндистан билән америка оттурисидики һәмкарлиқ мунасивити күчийишкә башлиған. Әмма америка вә хитай бирдәк пакистан үчүн зөрүр шерикләр болғачқа пакистан бу иккиси билән қандақ қилип тәңпуң мунасивәтни сақлап қелишқа тиришип кәлмәктә икән.

Апторниң пикричә, «хитай-пакистан иқтисадий каридори» ға четишлиқ чириклик һадисилири сәвәбидин хитай мәзкур қурулушқа аҗритиватқан мәбләғни азайтқан. Йәнә келип хәлқара пул-муамилә фонди изчил пакистан һөкүмитини өзлири қәрз бәргән пул арқилиқ хитайға қәрз төләшкә болмайдиғанлиқи тоғрисида агаһландуруп кәлмәктә икән. Буниң билән мәзкур қурулушниң тәрәққиятида барғансери рошән болған чекиниш мәнзириси көрүлүшкә башлиған. Иккинчи түрлүк қилип ейтқанда бу қурулушни йерим тохташ һалитигә чүшүп қалди, дейишкиму болидикән. Вилсон мәркизидики мутәхәссисләрдин майкил кугелман бу һәқтә пикир қилип: «пакистан һөкүмити йәнә бир яқтин мушу қурулушни дәп бунчә зор қәрзгә боғулуш мәсилисидә изчил иккилинип келиватиду» дәйду.

Мақалида көрситилишичә, һазир бейҗиңда зиярәттә болуватқан имран ханниң муһим нишанлириниң бири дәл мушу «йерим җан» һалитигә чүшүп қалған «хитай-пакистан иқтисадий каридори» ға қайтидин җан киргүзүш болидикән. Чүнки хитай һазир пакистанға қәрз пулни бирақла беришниң орниға һазир «аввал иш башлаш, андин шуниңға қарап қәрз бериш» усулини қолланмақтикән. Пакистанниң қурулушни давам қилғудәк мәблиғи болмиғачқа һазир бу қурулуш пүтүнләй тохташ һалитигә чүшүп қалған. Бу қурулушниң кәлгүси әһвалиниң қандақ болуши болса әмди икки дөләт оттурисидики сөһбәтниң тәрәққиятиға бағлиқ болидикән.

Пикирләр (0)
Share
Толуқ бәт