Xitay-pakistan iqtisadiy karidori iqtisadiy müshkülatta qalmaqta

Muxbirimiz eziz
2019-10-08
Élxet
Pikir
Share
Print

2015-Yilidin buyan xitay-pakistan munasiwitide, bolupmu pakistandiki axbarat saheside asasiy témilardin bolup kéliwatqan "Xitay-pakistan iqtisadiy karidori" ning daghdughiliri nöwette barghanséri xireliship méngiwatqan bolup, bir qisim analizchilar bu heqte oxshash bolmighan pikirlerni otturigha qoymaqta iken. Pakistanliq siyasiy analizchi muhemmed ekberning "Diplomat" zhurnilining 7-öktebir sanida élan qilin'ghan bu heqtiki maqalisi ene shuning biri hésablinidu.

Maqalida körsitilishiche, hazir bir qisim siyasiy analizchilar xitay bilen emes, belki amérika bilen bolghan munasiwetni kücheytish heqqide pikirlerge zéhin qoyushqa bashlighan. Lékin hazirqi weziyette pakistan hökümiti xitaygha bekrek tayinishqa mejbur bolghachqa, hindistan bilen amérika otturisidiki hemkarliq munasiwiti küchiyishke bashlighan. Emma amérika we xitay birdek pakistan üchün zörür shérikler bolghachqa pakistan bu ikkisi bilen qandaq qilip tengpung munasiwetni saqlap qélishqa tiriship kelmekte iken.

Aptorning pikriche, "Xitay-pakistan iqtisadiy karidori" gha chétishliq chiriklik hadisiliri sewebidin xitay mezkur qurulushqa ajritiwatqan mebleghni azaytqan. Yene kélip xelq'ara pul-mu'amile fondi izchil pakistan hökümitini özliri qerz bergen pul arqiliq xitaygha qerz töleshke bolmaydighanliqi toghrisida agahlandurup kelmekte iken. Buning bilen mezkur qurulushning tereqqiyatida barghanséri roshen bolghan chékinish menzirisi körülüshke bashlighan. Ikkinchi türlük qilip éytqanda bu qurulushni yérim toxtash halitige chüshüp qaldi, déyishkimu bolidiken. Wilson merkizidiki mutexessislerdin maykil kugélman bu heqte pikir qilip: "Pakistan hökümiti yene bir yaqtin mushu qurulushni dep bunche zor qerzge boghulush mesiliside izchil ikkilinip kéliwatidu" deydu.

Maqalida körsitilishiche, hazir béyjingda ziyarette boluwatqan imran xanning muhim nishanlirining biri del mushu "Yérim jan" halitige chüshüp qalghan "Xitay-pakistan iqtisadiy karidori" gha qaytidin jan kirgüzüsh bolidiken. Chünki xitay hazir pakistan'gha qerz pulni biraqla bérishning ornigha hazir "Awwal ish bashlash, andin shuninggha qarap qerz bérish" usulini qollanmaqtiken. Pakistanning qurulushni dawam qilghudek meblighi bolmighachqa hazir bu qurulush pütünley toxtash halitige chüshüp qalghan. Bu qurulushning kelgüsi ehwalining qandaq bolushi bolsa emdi ikki dölet otturisidiki söhbetning tereqqiyatigha baghliq bolidiken.

Toluq bet