Pakistan yéngi hökümitining xitay bilen hemkarliqi yéngi basquchqa qedem qoyghan

Pakistanning mu'awin bash ministiri qoshumche tashqi ishlar ministiri muhemmed is'haq dar 5-ayning 15-küni xitaygha ziyaretke kélip, xitay tashqi ishlar ministiri wang yi bilen körüshkende, pakistanning “Xitay-pakistan iqtisad karidori” ni yenimu güllendürüsh, yéngi téxnika, sün'iy eqil saheside xitay bilen téximu ilgirilep hemkarlishish arzusi barliqini bildürgen.

Xitay “Yer shari waqit géziti” de élan qilin'ghan bu xewerde yene, pakistan pilan-tereqqiyat, alahide qurulush ministiri éhsan iqbalning xitay muxbiri bilen ötküzgen söhbiti bérilgen bolup, éhsan iqbal “Xitay-pakistan iqtisad karidori” ning 10 yilliqini tebrikleydighanliqini, emdi bu qurulushning ikkinchi basquchluq tereqqiyatini ilgiri sürüsh üchün her waqit hazir ikenlikini, birinchi basquchluq qurulushtila uning pakistanning iqtisadigha ghayet zor yardimi bolghanliqini bildürgen.

 “Xitay-pakistan iqtisad karidori” xitayning “Bir belbagh bir yol” qurulushining bir qismi bolup, qeshqerdin pakistan'gha tutishidighan tashyol we tömür yol qurulushigha xitay ghayet zor meblegh salghanidi. Qeshqerning alahide iqtisadiy rayon we sayahetchilik merkizi bolushidimu bu iqtisad karidorining belgilik tesiri bolghanliqi melum.

Éhsan iqbal xitay muxbirigha bergen jawabida yene, xitayning kelgüside 4-ewlad yéngi sana'et inqilabigha, bolupmu sün'iy eqil téxnikisi we reqemlik iqtisad sahesige yétekchilik qilidighanliqini, pakistanningmu uningdin menpe'et élishni arzu qilidighanliqini, aliy ma'arip sahesidimu xitay bilen hemkarliship, xitaygha köplep oqughuchi ewetish pilanining barliqini bildürgen.

Pakistanning xitay bilen dawamliq hemkarlishishi, jümlidin qeshqerdin ötidighan “Xitay-pakistan iqtisad karidori” ni ilgirilep tereqqiy qildurmaqchi bolushi qeshqerning kelgüsige tesir körsitishi mumkin dep perez qilinmaqta. Shuning bilen birge, xitay hökümiti islamni xitaychilashturush siyasitini küchep dawam qiliwatqan bolup, musulmanlar dunyasidin héch sada kelmigen ehwalda, bir yaqtin iqtisadni qoral qilip, pakistan'gha oxshash islam döletlirini changgiligha élishqa urunuwatqanliqi körülmekte iken.