Pakistan bilen xitay “Iqtisad karidori” qurulushini qayta janlandurmaqchi bolghan

Qeshqerdin pakistanning gwadar portighiche sozulghan “Xitay-pakistan iqtisad karidori” qurulushi yéngi türler boyiche qayta tereqqiy qildurulidiken.

Sin'gaporda chiqidighan “Déngiz boghuzi géziti” torining 2-iyun bergen xewirige qarighanda, pakistan bash ministiri shehbaz sherif 6-ayning 4-küni xitayni ziyaret qilghanda, xitay bilen “Xitay-pakistan iqtisad karidori” qurulushini dawamlashturush üchün nechche on milyard dollarliq kélishim imzalaydiken.

Bu ziyarettin ilgiri pakistanning mu'awin bash ministiri is'haq dar xitayni ziyaret qilip, ikki dölet otturisidiki zor kölemlik meblegh sélish pilanini öz izigha salmaqchi bolghan. Chünki bu zor kölemlik qurulush maliye mesilisi we pakistandiki xitay puqralirining hujumgha uchrash weqeliridin kéyin toxtap qalghaniken.

Bu qétim pakistan bash ministiri shehbaz sherif xitay bash ministiri li chyang bilen körüshüp, “Xitay-pakistan iqtisad karidori” qurulushini dawamlashturush, xewpsizlik we dölet mudapi'esini kücheytish, énérgiye, pen-téxnika we ma'arip saheliride xitay bilen dawamliq hemkarlishish toghruluq söhbetlishidiken.

“Xitay-pakistan iqtisad karidori” énérgiye we qatnash-tiransportni asas qilghan ul eslihe qurulushi bolup, qeshqerdin pakistanning gwadar portighiche sozulghan tömür yol we tash yol qurulushigha 46 milyard dollar meblegh sélish pilanlan'ghan. Xitayning “Bir belbagh bir yol” qurulushining yadroluq qismi hésablan'ghan bu qurulush tamamlansa, xitay bilen ottura sherq, afriqa we yawropa döletlirini tutashturidighan soda yoli échilip, xitayning tashqi soda yolini qisqartishta pewqul'adde muhim rol oynaydiken. Halbuki, bu qurulush xitay iqtisadining chékinishi, pakistandiki muqimsizliq we xewpsizlik mesilisi tüpeylidin toxtap qalghan.

Xitayning qeshqerni muhim soda we sayahet rayoni qilip échishi, jümlidin qeshqerde erkin soda rayoni qurushi qatarliqlar “Xitay-pakistan iqtisad karidori” ni qayta échish we güllendürüsh bilen munasiwetlik dep qarilip kelmekte.