Пакистан баш министири: “уйғурларниң әһвалидин хәвирим йоқ”
Пакистан баш министири имранхан 8-январ күни түркийә мәтбуатиниң зияритини қобул қилғанда уйғурларниң әһвалидин хәвири йоқлиғини билдүргән.
-
Мухбиримиз әркин
2019-01-09 -
-
-
Пакистан баш министири имранхан 8-январ күни түркийә мәтбуатиниң зияритини қобул қилғанда уйғурларниң әһвалидин хәвири йоқлиғини билдүргән.
Имранхан йеқинқи 10 күн ичидә чәтәл таратқулириниң зияритини қобул қилип, уйғурлар һәққидики соалға дуч кәлгән әң юқири дәриҗилик 2-пакистан әмәлдаридур.
Йеқинда пакистан президенти ариф алви әл-җәзирә телевизийә қанилиниң зияритини қобул қилип, уйғур мәсилисидә хитайни қоллайдиғанлиқини билдүргән. Алвиниң сөзи хәлқара таратқуларниң қаттиқ тәнқидигә учриған иди.
Пакистан “алаһидә мунбири” гезитиниң хәвәр қилишичә, имранхан 8-январ күни түркийә радио-телевизийәси дуня қанили мухбириниң зияритини қобул қилғанда уйғурлар һәққидики юқириқи сөзни қилған. У мухбирниң “сизниң хитай билән болған наһайити йеқин сода мунасивитиңиз, хитайларниң уйғурларға немиләрни қиливатқанлиқини тәнқид қилмаслиқиңиз керәкликидин дерәк берәмду” дегән соалиға җаваб берип, өзиниң хитайниң ғәрбий-шимал өлкиси болған шинҗаңдики уйғур мусулманлириниң әһвалидин көп хәвири йоқлиғини билдүргән. Имранхан бу сөзни б д т, америка башчилиқидики ғәрб дөләтлири вә хәлқара кишилик һоқуқ тәшкилатлири хитайниң бир милйондин артуқ уйғурни йиғивелиш лагерлириға қамап, уларни мәҗбурий әмгәккә селиватқанлиқи, уларни диний етиқади, мәдәнийити, вә тилидин ваз кечишкә мәҗбурлаватқанлиқи, лекин ислам дөләтлириниң буниңға сүкүт қиливатқанлиқи илгири сүрүлүватқан бир мәзгилдә қилған.
Т р т мухбириниң “түркийә һөкүмити уйғур районидики кишилик һоқуқ дәпсәндичиликигә көз юмақта” дәп тәнқидкә учраватқан бир вақитта пакистан баш министиридин бу соални сориши диққәт қозғиди. Имранханниң т р т мухбириға билдүрүшичә, хитай пакистан билән нурғун саһәләрдә һәмкарлиқ елип бериватқан болсиму, лекин хитай бу һәмкарлиқ түрлириниң тәпсилатини елан қилишини халимайдикән.
Пакистан “алаһидә мунбири” гезити “вашингтон почтиси гезити” ниң хәвирини нәқил кәлтүрүп, нөвәттә 20 яш билән 79 яш арилиқидики бир милйон 100 дәк уйғурниң йиғивелиш лагерлирида тутуп турулуватқанлиқи, бу уйғур нопусиниң он бир йерим пирсәнтини тәшкил қилидиғанлиқини билдүргән.