Pakistan bash ministiri: “Uyghurlarning ehwalidin xewirim yoq”

• Muxbirimiz erkin
  2019-01-09

Pakistan bash ministiri imranxan 8‏-yanwar küni türkiye metbu'atining ziyaritini qobul qilghanda Uyghurlarning ehwalidin xewiri yoqlighini bildürgen.

Imranxan yéqinqi 10 kün ichide chet'el taratqulirining ziyaritini qobul qilip, Uyghurlar heqqidiki so'algha duch kelgen eng yuqiri derijilik 2‏-pakistan emeldaridur.

Yéqinda pakistan prézidénti arif alwi el-jezire téléwiziye qanilining ziyaritini qobul qilip, Uyghur mesiliside xitayni qollaydighanliqini bildürgen. Alwining sözi xelq'ara taratqularning qattiq tenqidige uchrighan idi.

Pakistan “Alahide munbiri” gézitining xewer qilishiche, imranxan 8‏-yanwar küni türkiye radi'o-téléwiziyesi dunya qanili muxbirining ziyaritini qobul qilghanda Uyghurlar heqqidiki yuqiriqi sözni qilghan. U muxbirning “Sizning xitay bilen bolghan nahayiti yéqin soda munasiwitingiz, xitaylarning Uyghurlargha némilerni qiliwatqanliqini tenqid qilmasliqingiz kéreklikidin dérek béremdu” dégen so'aligha jawab bérip, özining xitayning gherbiy-shimal ölkisi bolghan shinjangdiki Uyghur musulmanlirining ehwalidin köp xewiri yoqlighini bildürgen. Imranxan bu sözni b d t, amérika bashchiliqidiki gherb döletliri we xelq'ara kishilik hoquq teshkilatliri xitayning bir milyondin artuq Uyghurni yighiwélish lagérlirigha qamap, ularni mejburiy emgekke séliwatqanliqi, ularni diniy étiqadi, medeniyiti, we tilidin waz kéchishke mejburlawatqanliqi, lékin islam döletlirining buninggha süküt qiliwatqanliqi ilgiri sürülüwatqan bir mezgilde qilghan.

T r t muxbirining “Türkiye hökümiti Uyghur rayonidiki kishilik hoquq depsendichilikige köz yumaqta” dep tenqidke uchrawatqan bir waqitta pakistan bash ministiridin bu so'alni sorishi diqqet qozghidi. Imranxanning t r t muxbirigha bildürüshiche, xitay pakistan bilen nurghun sahelerde hemkarliq élip bériwatqan bolsimu, lékin xitay bu hemkarliq türlirining tepsilatini élan qilishini xalimaydiken.

Pakistan “Alahide munbiri” géziti “Washin'gton pochtisi géziti” ning xewirini neqil keltürüp, nöwette 20 yash bilen 79 yash ariliqidiki bir milyon 100 dek Uyghurning yighiwélish lagérlirida tutup turuluwatqanliqi, bu Uyghur nopusining on bir yérim pirsentini teshkil qilidighanliqini bildürgen.