"ташқи сиясәт" журнили: "пакистан баш министери имранханниң уйғур мәсилисидики сүкүти униң мусулманлар дунясида гәп қилидиған йүзини қоймиди"

Мухбиримиз җәвлан
2021-02-02
Share

"ташқи сиясәт" журнилиниң йеқинда елан қилған бир мақалисидә қәйт қилинишичә, пакистан баш министери имранханниң уйғур мәсилисидә бир еғизму гәп қилмаслиқи униң мусулманлар дунясиниң мәйданида туруп гәп қилиш салаһийитигә еғир тәсир йәткүзгән.

Мақалидә көрситилишчә, өзини "мусулманлар дунясиниң қоғдиғучиси" орнида көридиған пакистан баш министери имранхан йеқинқи бир нәччә айдин бери франсийә президенти макеронни "мусулманлардин қорқуш кесилини күчәйтиватиду" дәп әйблигән һәмдә пәләстинни қоллап, исраилийәгә қарши туридиған гәпләрни қилған. У йәнә чечәнистан, йәмән, пәләстин вә кәшмирдики мусулманлар учраватқан хорлуқларни әйблигән болсиму, хитайниң уйғурларға йүргүзүватқан қәбиһ җинайәтлири, ислам диниға қиливатқан һуҗумлири һәққидә һечнемә демигән. Әмәлийәттә уйғур мусулманлири учраватқан зиянкәшлик һәммидин еғир болуп, хитай бу районида ислам динини пүтүнләй йоқитишқа урунуп кәлмәктә.

Өткән йили имранхандин уйғурлар мәсилиси соралғанда өзиниң бу һәқтә һечнемә билмәйдиғанлиқини ейтқан, андин униң алий бихәтәрлик мәслиһәтчиси муид йүсүп хитайға берип кәлгәндин кейин, "пакистан һөкүмити шинҗаң вәзийитидин йүз пирсәнт мәмнун, у йәрдә һечқандақ мәсилә йоқ" дегән. Мақалидә билдүрүлүшичә, имранханниң уйғур мәсилисидә сүкүттә турушиниң сәвәби наһайити ениқ: хитай пакистанни өзиниң әң йеқин дости дәп қарайду. Пакистанниң иқтисадий хитайға еғир дәриҗидә беқинип қалған. Шуңа пакистан уйғурлар мәсилисини дәп хитай билән йириклишип қалмайду. Әмма немә болушидин қәтийнәзәр, униң уйғур мусулманлири учраватқан зулумға сүкүт қилиши униңға һәргиз "мусулманлар дунясиниң қоғдиғучиси" салаһийитини берәлмәйду, һәтта уни мәнпәәтпәрәст вә икки йүзлимичи қилип көрситиду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт