"Tashqi siyaset" zhurnili: "Pakistan bash ministéri imranxanning Uyghur mesilisidiki süküti uning musulmanlar dunyasida gep qilidighan yüzini qoymidi"

Muxbirimiz jewlan
2021-02-02
Share

"Tashqi siyaset" zhurnilining yéqinda élan qilghan bir maqaliside qeyt qilinishiche, pakistan bash ministéri imranxanning Uyghur mesiliside bir éghizmu gep qilmasliqi uning musulmanlar dunyasining meydanida turup gep qilish salahiyitige éghir tesir yetküzgen.

Maqalide körsitilishche, özini "Musulmanlar dunyasining qoghdighuchisi" ornida köridighan pakistan bash ministéri imranxan yéqinqi bir nechche aydin béri fransiye prézidénti makéronni "Musulmanlardin qorqush késilini kücheytiwatidu" dep eybligen hemde pelestinni qollap, isra'iliyege qarshi turidighan geplerni qilghan. U yene chéchenistan, yemen, pelestin we keshmirdiki musulmanlar uchrawatqan xorluqlarni eybligen bolsimu, xitayning Uyghurlargha yürgüzüwatqan qebih jinayetliri, islam dinigha qiliwatqan hujumliri heqqide héchnéme démigen. Emeliyette Uyghur musulmanliri uchrawatqan ziyankeshlik hemmidin éghir bolup, xitay bu rayonida islam dinini pütünley yoqitishqa urunup kelmekte.

Ötken yili imranxandin Uyghurlar mesilisi soralghanda özining bu heqte héchnéme bilmeydighanliqini éytqan, andin uning aliy bixeterlik meslihetchisi mu'id yüsüp xitaygha bérip kelgendin kéyin, "Pakistan hökümiti shinjang weziyitidin yüz pirsent memnun, u yerde héchqandaq mesile yoq" dégen. Maqalide bildürülüshiche, imranxanning Uyghur mesiliside sükütte turushining sewebi nahayiti éniq: xitay pakistanni özining eng yéqin dosti dep qaraydu. Pakistanning iqtisadiy xitaygha éghir derijide béqinip qalghan. Shunga pakistan Uyghurlar mesilisini dep xitay bilen yirikliship qalmaydu. Emma néme bolushidin qet'iynezer, uning Uyghur musulmanliri uchrawatqan zulumgha süküt qilishi uninggha hergiz "Musulmanlar dunyasining qoghdighuchisi" salahiyitini bérelmeydu, hetta uni menpe'etperest we ikki yüzlimichi qilip körsitidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet