Пакистанлиқ журналист мусулман дөләтлириниң уйғур мәсилисигә көз юмувалғанлиқини тәнқид қилди

Мухбиримиз әркин
2019-05-10
Елхәт
Пикир
Share
Принт

Америкадики пакистанлиқ журналист ерфан хан «асия вақти» торида мақалә елан қилип, пакистан вә башқа мусулман дөләтләрниң уйғур мәсилисигә көз юмувалғанлиқини тәнқид қилған.

Ерфан хан «уйғур мусулманлириниң тәқдиридә қариғу болувелиш» сәрләвһилик мақалисидә йәнә пакистан таратқулириниң уйғурлар һәққидики хәвәр-мақалиларни басмайдиғанлиқини тәнқидлигән. У пакистан баш министири имран ханниң бу йил 3‏-айда «малийә вақти гезити» ниң зияритини қобул қилғанда униң уйғурлар һәққидики соалға «мән уларниң әһвалини билмәйдикәнмән» дәп җаваб бәргәнлики шуниңдәк йәнә пакистан таратқулириниң уйғурлар һәққидики хәвәрләрни ашкара чәкләватқанлиқини билдүргән.

Униң ашкарилишичә, пакистандики «алаһидә мунбәр» гезити өткән сәйшәнбә күни мәзкур гезитниң обзорчиси муһмат заманниң уйғурлар һәққидики мақалисини басмиған. Мәзкур гезит бу мақалини басмаслиқта «бу мәсилисиниң бәк сәзгүр» икәнликини баһанә қилип көрсәткән. Апторниң қәйт қилишичә, муһмат заман мақалисидә уйғур мусулманлириниң хитай дөлитиниң җазалишиға учраватқанлиқи, уларниң түп диний әркинлики тартивелинип, исламий әқидилиридин вә әнәнилиридин вәз кечишкә мәҗбурланғанлиқи, пакистан даим һиндистанниң кәшмирдики, исраилийәниң пәләстиндики қилмишни тәнқид қилсиму, лекин пакистан вә башқа мусулман дөләтләр һечқачан хитайниң уйғур мусулманлириға тутқан муамилисигә наразилиқ билдүрүп бақмиғанлиқини тәнқидлигән икән.

Ерфан хан мақалисидә йәнә бүгүнки күндә уйғурларниң диний етиқади чәклинишкә, өзлири болса тутқун қилинишқа, һәтта өлтүрүлүшкә дуч келиватқанлиқи, һәр саһәдики уйғурларниң роза тутуши һәмдә миллий кийимлирини кийиши чәклинип, хитай һөкүмитиниң уларни «исянчи», «террорчи» дәп елан қилғанлиқини, лекин пакистан вә башқа мусулман дөләтләрниң буни тәнқид қилишниң орниға көз юмивалғанлиқини әйиплигән.

Пикирләр (0)
Share
Толуқ бәт