Pakistanliq zhurnalist musulman döletlirining Uyghur mesilisige köz yumuwalghanliqini tenqid qildi

Muxbirimiz erkin
2019-05-10
Élxet
Pikir
Share
Print

Amérikadiki pakistanliq zhurnalist érfan xan "Asiya waqti" torida maqale élan qilip, pakistan we bashqa musulman döletlerning Uyghur mesilisige köz yumuwalghanliqini tenqid qilghan.

Érfan xan "Uyghur musulmanlirining teqdiride qarighu boluwélish" serlewhilik maqaliside yene pakistan taratqulirining Uyghurlar heqqidiki xewer-maqalilarni basmaydighanliqini tenqidligen. U pakistan bash ministiri imran xanning bu yil 3‏-ayda "Maliye waqti géziti" ning ziyaritini qobul qilghanda uning Uyghurlar heqqidiki so'algha "Men ularning ehwalini bilmeydikenmen" dep jawab bergenliki shuningdek yene pakistan taratqulirining Uyghurlar heqqidiki xewerlerni ashkara cheklewatqanliqini bildürgen.

Uning ashkarilishiche, pakistandiki "Alahide munber" géziti ötken seyshenbe küni mezkur gézitning obzorchisi muhmat zamanning Uyghurlar heqqidiki maqalisini basmighan. Mezkur gézit bu maqalini basmasliqta "Bu mesilisining bek sezgür" ikenlikini bahane qilip körsetken. Aptorning qeyt qilishiche, muhmat zaman maqaliside Uyghur musulmanlirining xitay dölitining jazalishigha uchrawatqanliqi, ularning tüp diniy erkinliki tartiwélinip, islamiy eqidiliridin we en'eniliridin wez kéchishke mejburlan'ghanliqi, pakistan da'im hindistanning keshmirdiki, isra'iliyening pelestindiki qilmishni tenqid qilsimu, lékin pakistan we bashqa musulman döletler héchqachan xitayning Uyghur musulmanlirigha tutqan mu'amilisige naraziliq bildürüp baqmighanliqini tenqidligen iken.

Érfan xan maqaliside yene bügünki künde Uyghurlarning diniy étiqadi cheklinishke, özliri bolsa tutqun qilinishqa, hetta öltürülüshke duch kéliwatqanliqi, her sahediki Uyghurlarning roza tutushi hemde milliy kiyimlirini kiyishi cheklinip, xitay hökümitining ularni "Isyanchi", "Térrorchi" dep élan qilghanliqini, lékin pakistan we bashqa musulman döletlerning buni tenqid qilishning ornigha köz yumiwalghanliqini eyipligen.

Toluq bet