Palaw pirézidénti qayta saylan'ghandin kéyin xitayni qattiq eyibligen

Xitayning jenubi déngizdiki kéngeymichiliki tinch okyandiki  aral döletlirinimu bi'aram qilishqa bashlighan. Palaw pirézidénti suran'gil wippis (Surangel Whipps) tinch okyandiki aral döliti bolghan palaw jumhuriyitining pirézidénti bolup qayta saylan'ghandin kéyin xitayni qattiq eyibligen.

“Eljezire” qanilining 13-noyabir élan qilghan xewiridin melum bolushiche, palaw pirézidénti suran'gil wippis xitayning filippin qatarliq döletlerdinmu ötüp, öz tewelikige kiriwatqanliqini eyiblep: “Xitayning tekshürüsh kémiliri déngiz tewelikimizge toxtimay kiriwatidu, ular bizning igilik hoquqimiz we chégrayimizgha hörmet qilmay keldi” dégen. Uning bildürüshiche, xitay da'iriliri palawgha tewe déngiz astidiki ikki tagh tizmisigha xitayche nam bergen bolup, bu emeliyette ashkara ighwagerchilik hésablinidiken.  

 Xewerde éytilishiche, suran'gil wippis ilgiri amérika armiyesining bu aralda turushini mudapi'e üchün paydiliq dep qarighan hemde xewpsizlik jehettin amérika bilen hemkarliship kelgen. Xitayning teywen boghuzidiki herbiy manéwiri köpeygendin kéyin, amérika armiyesi bu aralda yiraqtin sézidighan radar ponkiti qurghan.

Palaw jumhuriyiti teywenning musteqilliqini étirap qilidighan bir qanche döletning biri bolup, shu sewebtin xitay bu döletni sayahetchiler barmaydighan qara tizimlikke kirgüzüp, uning sayahetchilik kirimini azaytiwetken. Halbuki, palawning qayta saylan'ghan pirézidénti suran'gil wippis bu qétim xitaygha keskin inkas qayturup qattiq eyibligen.