Pirézidént donald tramp panama qanilini xitaydin qayturuwalidighanliqini tekitlidi

Amérika pirézidénti donald tramp 4-mart küni amérika dölet mejliside qilghan sözide, tamozhna béji arqiliq amérikaning heqqini qayturuwalidighanliqi hemde amérikiliqlarning zémini we xizmet ornini qoghdaydighanliqini bildürdi.

Amérika hökümiti kanada bilen méksikagha 25 pirsent tamozhna béji qoyghandin kéyin, xitaygha qoyghan tamozhna béjini yigirme pirsentke chiqarghan bolup, shuning bilen 2018-yildin buyan xitaygha qoyghan tamozhna béji jem'iy 45 pirsentke yetken. Xitay tashqi ishlar ministirliqi buninggha inkas qayturup: “Xitay xelqi buningdin qorqup qalmaydu” dégen.

BBC Ning 5-féwral bergen bir xewiride, xitayning amérika bilen her qandaq shekildiki “Urush” qa teyyar ikenliki, amérikadin öch élish üchün amérikaning déhqanchiliq mehsulatliridin 10 pirsenttin 15 pirsentkiche tamozhna béji alidighanliqi qeyt qilin'ghan.

Pirézidént tramp yene dölet mejliside qilghan sözide, panama qanilini xitayning qolidin qayturuwalidighanliqini tekitlep: “Bu qanal kartér hökümiti teripidin bek erzan bériwétildi, emma kélishimge xilapliq qilindi. Biz bu qanalni xitaygha emes, panamagha berduq, emdi uni qayturup alimiz” dédi.

Xewerlerdin melum bolushiche, ilgiri panama qanilining tijaret hoquqini xitayning xongkongdiki bir shirkiti bashqurup kéliwatqan bolup, nöwette uni amérikaning qaratash (BlackRock)maliye guruhi ötküzüwalmaqchi bolghan.

Pirézidént tramp sözide yene, xitayning amérikagha kirgüzüwatqan féntanil zeherlik buyumlirining amérikadiki a'ililerni weyran qiliwatqanliqini, kanada we méksika qatarliq döletlerning buninggha yol bériwatqanliqini eskertip, amérikaliqlarning hayatigha we menpe'etige ziyan salidighan her qandaq tijaret we uninggha yol qoyghan döletke qattiq chare qollinidighanliqini bildürgen.