Бир қисим уйғур кадирларниң “парихорлуқ” билән қолға елиниши гуман қозғимақта

Хитай һөкүмити башқуришидики “хәлқ тори” ниң  өткән һәптидики хәвиридә ейтилишичә, мәкит наһийә йеза иқтисадий идарисиниң кадири атикәм имин вә наһийәлик сақчи идарисииниң сақчиси имам қурбан “парихорлуқ” билән әйиблинип қолға елинған. 

Уйғур дияридики уйғур әмәлдарларниң “тазилиниши” өткән бирнәччә йилда изчил давам қилип кәлгән һадисиләрдин болуп, буниңда изчил аталмиш “икки йүзлимилик қилмиши” уларниң қамаққа яки лагирларға беришидики асасий баһанә-сәвәб болуп кәлгән иди. Бу җәрянда бир қисим юқури дәриҗилик ‍уйғур әмәлдарларға йәнә “парихорлуқ” җинайитиниңму артилғанлиқи диққәт қозғиған иди. 

Һалбуки, уйғур дияридики барлиқ иқтисадий саһәниң хитай кадирларниң контроллуқида икәнликини тәкитлигән бәзи анализчилар уйғур кадирларниң иқтисадий җинайәт садир қилғудәк имканийитиниң толиму чәклик икәнликини, бундақ әһвалда уйғур хизмәтчиләрниң “парихорлуқ” қилиш еһтималлиқиниң техиму аз болидиғанлиқини тилға алиду. Хитай өктичи зиялиси чен покоң уйғур кадирларниң қолға елиниши һәққидә сөз қилип: “хитай һөкүмити һечқачан уйғур хизмәтчиләргә толуқ ишинип баққан әмәс. Уларни қамаққа елиш үчүн һөкүмәт һәрқандақ баһаниләрни ойдуруп чиқиралайду,” дегән иди.