“ғайиблар аниси” патигүл ғулам түрмидин қоюп берилгән

Радийомиз мухбириниң ишәнчлик мәнбәләрдин игилишичә, 2009-йилидики үрүмчи “5-июл вәқәси” дин кейин ғайиб қиливетилгән оғлиниң из-дерикини қилишни тохтатмиған һәмдә мушу сәвәблик “5-июл ғайиблар аниси” дәп аталған патигүл ғулам 27-май күни қоюп берилгән.

Патигүл ғуламни хитай даирилириниң 7-апрел күни мәхпий сотлимақчи болғанлиқи һәққидики хәвәрләр тарқалғандин кейин, хәлқарадики инсан һәқлири тәшкилатлири буниңға күчлүк наразилиқ билдүргән, шундақла явропада патигүл ғуламни азадлиққа чиқириш мураҗиәтнамиси елан қилинған. Шуниң билән биргә, америка инсан һәқлирини көзитиш тәшкилати хитай бөлүминиң мудири софей речардсон ханим, дуня уйғур қурултийиниң рәиси рабийә қадир ханим һәмдә америкидики уйғур инсан һәқлири қурулуши тәшкилати қатарлиқлар бу һәқтә мәхсус баянат елан қилип, патигүл ғуламни қоюп беришни тәләп қилған иди.

Патигүл ғуламниң түрмидин қоюп берилгәнлики мәлум болған болсиму, һазирчә бу һәқтики тәпсилатлар, шундақла униң ғайиб қиливетилгән оғли имам муһәммәтелиниң из-дерики ениқ әмәс.