Уйғур диярида ишләпчиқирилип италийәгә әвәтилгән 40 контенер пәмидур қиями қаршилиққа учриған

Уйғур диярида ишләпчиқирилип италийәниң салерно портиға йетип кәлгән 40 контенер пәмидур қиями италийәдики колдерите (Coldiretti) Намлиқ әң чоң йеза игилик тәшкилатиниң қаршилиқиға учриған.

Мәзкур тәшкилатниң 29-май күни X та елан қилған учурлиридин мәлум болушичә, италийәни асас қилған һалда явропа бойичә бир милйон 600 миң әзаси бу тәшкилатлириниң әзалири, салерно портида мәҗбурий әмгәк мәһсулати болған 40 контенерлиқ “шинҗаң пәмидури” ни басқан йүк парахотиниң салерно портиға киришигә наразилиқ билдүргән. Мәлум болушичә, бу мәһсулатлар бу йил 29-апрел күни уйғур дияридин йолға чиқип хитай-явропа төмүр йоли арқилиқ явропаға йетип барған вә бу йәрдин парахотқа бесилип салерно деңиз портиға йетип кәлгән. Хитай таратқулири йеқинда мал басқан бир йүк пойизиниң уйғур дияридин қозғилип италийәгичә йетип барғанлиқини хәвәр қилған иди.

Бу хәвәр кишилик һоқуқ тәшкилатлириниң диққитини қозғап, италийә һөкүмитиниң уйғур дияридин кәлгән мәһсулатларни тосуши тәләп қилинған иди. Хитайниң уйғур диярида ишләпчиқирилған мәһсулатларни явропаға йоллашни көпәйтиши, явропа иттипақиниң йеқинда “мәҗбурий әмгәкни чәкләш низами” мақуллап, иҗра қилишқа тәйярлиқ қиливатқан бир пәйттә йүз бәрмәктә.

Хитай таможна даирилириниң санлиқ мәлуматида көрситилишичә, уйғур дияриниң явропаға чиқарған експорти бу йилниң дәсләпки үч ейида 200 пирсәнттин көп артқан. Италийәниң Coldiretti Тәшкилати 29-май күни елан қилған учурида, италийәниң 2023-йили хитайниң 85 милйон килогирам пәмидур мәһсулати импорт қилғанлиқи, буниң мутләқ көп қисминиң уйғур дияридин кәлгәнликини билдүргән.

Мәлум болушичә, хитай дуня бойичә пәмидур мәһсулатлирини әң көп ишләпчиқарғучи дөләт болуп, уйғур дияри униң асаслиқ пәмидур базиси икән. Хитай һөкүмәт таратқулириниң хәвәрлиридә, 2023-йили хитайда ишләпчиқирилған пәмидурниң 80 пирсәнтиниң уйғур диярида ишләпчиқирилғанлиқини билдүрмәктә.