Uyghur diyarida ishlepchiqirilip italiyege ewetilgen 40 konténér pemidur qiyami qarshiliqqa uchrighan

Washin'gtondin muxbirimiz erkin teyyarlidi
2024.05.31

Uyghur diyarida ishlepchiqirilip italiyening salérno portigha yétip kelgen 40 konténér pemidur qiyami italiyediki koldérité (Coldiretti) Namliq eng chong yéza igilik teshkilatining qarshiliqigha uchrighan.

Mezkur teshkilatning 29-may küni X ta élan qilghan uchurliridin melum bolushiche, italiyeni asas qilghan halda yawropa boyiche bir milyon 600 ming ezasi bu teshkilatlirining ezaliri, salérno portida mejburiy emgek mehsulati bolghan 40 konténérliq “Shinjang pemiduri” ni basqan yük paraxotining salérno portigha kirishige naraziliq bildürgen. Melum bolushiche, bu mehsulatlar bu yil 29-aprél küni Uyghur diyaridin yolgha chiqip xitay-yawropa tömür yoli arqiliq yawropagha yétip barghan we bu yerdin paraxotqa bésilip salérno déngiz portigha yétip kelgen. Xitay taratquliri yéqinda mal basqan bir yük poyizining Uyghur diyaridin qozghilip italiyegiche yétip barghanliqini xewer qilghan idi.

Bu xewer kishilik hoquq teshkilatlirining diqqitini qozghap, italiye hökümitining Uyghur diyaridin kelgen mehsulatlarni tosushi telep qilin'ghan idi. Xitayning Uyghur diyarida ishlepchiqirilghan mehsulatlarni yawropagha yollashni köpeytishi, yawropa ittipaqining yéqinda “Mejburiy emgekni cheklesh nizami” maqullap, ijra qilishqa teyyarliq qiliwatqan bir peytte yüz bermekte.

Xitay tamozhna da'irilirining sanliq melumatida körsitilishiche, Uyghur diyarining yawropagha chiqarghan éksporti bu yilning deslepki üch éyida 200 pirsenttin köp artqan. Italiyening Coldiretti Teshkilati 29-may küni élan qilghan uchurida, italiyening 2023-yili xitayning 85 milyon kilogiram pemidur mehsulati import qilghanliqi, buning mutleq köp qismining Uyghur diyaridin kelgenlikini bildürgen.

Melum bolushiche, xitay dunya boyiche pemidur mehsulatlirini eng köp ishlepchiqarghuchi dölet bolup, Uyghur diyari uning asasliq pemidur bazisi iken. Xitay hökümet taratqulirining xewerliride, 2023-yili xitayda ishlepchiqirilghan pemidurning 80 pirsentining Uyghur diyarida ishlepchiqirilghanliqini bildürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.