Qamaqtiki milyonlighan Uyghur we peyghemberning resimi

Yéqinqi bir aydin buyan dunyaning herqaysi jayliridiki musulmanlar jama'iti fransiye prézidénti émmanyul makronning “Musulmanlarning muhemmed eleyhisalamning karton resimi üchün ghezeplen'genlikini toghra chüshinimen. Emma buningliq bilen bu resimni oqughuchilargha körsetken bir oqutquchining kallisini késishtek qebih qilmishni aqlighili bolmaydu,” dégen sözidin narazi bolup, fransiyege qarshi namayish qiliwatqanliqi melum. 16-Noyabir küni fransiyediki Uyghur pa'aliyetchilerdin dilnur reyhan “Dunya” gézitide obzor élan qilip: “Milyonlighan Uyghurning jéni ashu resimlergimu yetmemdu?” dep so'al qoyghan.

Aptor maqalisida “Oqutquchining kallisini élish” weqesini fransiyediki musulmanlarla emes, dunyaning bashqa jayliridiki milyonlighan musulmanlarningmu eyiblewatqanliqini, shundaqla islam dinining héchqachan bundaq qebihlikni terghib qilmaydighanliqini tekitleydu. Shuning bilen birge “Peyghemberning resimini körsitish” weqesidin shunche “Ghezep” ke kelgen musulmanlar dunyasining nöwette irqiy qirghinchiliq qiliwatqan, milyonlarche Uyghurni lagérgha qamap qiynawatqan xitay hökümitige “Ghezep qilmasliqi” gha bolghan heyranliqini ipadileydu. Shuningdek birleshken döletler teshkilatida xitay hökümitining Uyghurlarni basturush qilmishini qollighan 50 nechche döletning yérimi islam döletliri ikenlikini eskertidu.

Melum bolushiche, muhajirettiki bir qisim analizchilar musulmanlar dunyasida yéqindin buyan ewj éliwatqan “Fransiye mallirini bayqut qilish”, “Fransiyege bolghan nepritini ipadilesh” namayishlirini tenqidlep: “Bu bejayiki ‛chiwin qonsa ghingshiysen, kaltek tegse jim‚ dégenning neq özi bolmaqta,” déyishmekte iken.