Mayk pampéyo xitayning pütün dunyagha yéngi kowid wariyantini yuqturushidin agah bolushqa chaqirghan

Amérikaning sabiq tashqiy ishlar ministiri mayk pampéyo xitayning yéngi yildin bashlap yolgha qoyidighan kowid siyasiti arqiliq pütün dunyagha yuqum tarqatmaqchi bolush qestidin agahlandurghan hemde amérika we bashqa chong döletlerning rehberlirini xitaydin kélidighan sayahetchilerni kirgüzmeslikke chaqirghan.

“Tor qarawuli” (Gateway Pundit) torining xewer qilishiche, xitay hökümiti yéngi yildin bashlap tamozhna cheklimisini boshitip, xitaygha kiridighan chet ellikler we chet elge chiqidighan xitay puqralirini keng qoyuwétidighanliqini jakarlighandin kéyin, mayk pampéyo 1-yanwar, yeni yekshenbe küni özining küchlük endishisini bildürüp: “Milyonlighan xitaylar yuqumlan'ghan turuqluq, ularning ellik pirsenti chet elde qatrap yürmekte” dégen hemde amérika we dunyadiki bashqa döletlerning xitaygha qarita ishikini ching taqishi kéreklikini qayta-qayta tekitligen. U xitay re'isi shi jinpingning pütün dunyagha kowidning yéngi wariyantini yuqturup, eslidinla kowid wabasidin qutulalmaywatqan dunyagha yéngi apet élip kélishni qestlewatqanliqidin agahlandurghan.

Kowidni tizginlesh üchün üch yildin béri küchlük qamal siyasitini yolgha qoyghan xitayning tosattinla hemmini échiwétip, yéngi balayi-apetning yamrishigha seweb bolidighanliqi küchlük endishe peyda qiliwatqan bolup, amérika qatarliq bir qanche dölet xitay yoluchilirining ayropilan'gha chiqishitin burun kowid tekshürüshi qilishi kéreklikini telep qilghan.