Sabiq amérika tashqi ishlar ministiri pompéo özining 2024-yildiki prézidéntliq saylimigha teyyar ikenlikini éytqan

2021-Yili 1-ayda, amérikaning sabiq tramp hökümiti hoquqni prézidént baydén'gha ötküzüp bérishtin bir kün awwal, xitayning Uyghurlargha irqiy qirghinchiliq qilghanliqini élan qilghan sabiq amérika tashqi ishlar ministiri mayk pompéo, amérikaning 2024-yildiki prézidéntliq saylimida namzat bolushqa teyyar ikenlikini bildürgen. Melum bolushiche, eger mayk pompéo heqiqeten özini namzatliqqa körsetse, u sabiq prézidént tramp bilen jumhuriyetchilerning prézidént namzatliqini talishidiken.

Buning aldida sabiq prézidént tramp özini'ing 2024-yildiki saylamda jumhuriyetchilerdin qayta namzat bolidighanliqi we saylamda utup chiqidighanliqini éytqan. Lékin pompéo trampning özini qayta namzatliqqa körsitishi, uning prézidéntliqni talishish qararigha tesir körsetmeydighanliqini bildürgen.

En'gliye “Taymiz” gézitining ashkarilishiche, mayk pompéo en'gliyege qilghan yéqinqi bir ziyaritide “Taymiz” gézitige özining namzatliqqa teyyar ikenliki, trampning 2024-yildiki saylamda qayta prézidéntliqni talishidighanliqini élan qilishi, uning prézidéntliqqa namzat bolush qararigha tesir qilmaydighanliqini bildürgen.

58 Yashliq mayk pompéo xitayning Uyghurlargha qarita keng kölemlik tutqun élip bérip, milyonlighan kishini lagér, türmilerge qamighan, mejburiy emgekke salghan, a'ililerni parchilighan, Uyghur ayallirini tughmas qilip, Uyghur nopusining aziyip kétishini keltürüp chiqarghan achquchluq bir waqitta wezipige ötigen. U tashqi ishlar ministirliq wezipisini ötigen 2018-yildin 2021-yilghiche bolghan 3 yil jeryanida Uyghurlar mesilisi amérika tashqi siyasiti we amérikaning xitay bilen bolghan munasiwetliridiki muhim amilgha aylan'ghan. U yene b d t da Uyghurlar toghriliq yighin chaqirghan, chet'eller bilen bolghan uchrishishlirida Uyghurlar mesilisini izchil otturigha qoyup kelgen tunji amérika tashqi ministiri bolghan. Melum bolushiche, mayk pompéo hem amérika merkizi istixbarat idarisining bashliqi hem tashqi ishlar ministirliqining ministirliq wezipisini ötigen tunji kishi iken. Pompéo 2017-yildin 2018-yilghiche merkizi istixbarat idarisining bashliqliq wezipisini atqurghanidi.