Майк помпейо: «уйғурлар учраватқан паҗиәләргә әмди хатимә бериш керәк!»

Мухбиримиз әзиз
2020-08-05
Елхәт
Пикир
Share
Принт

Хитай һөкүмитиниң уйғур дияридики қаттиқ қоллуқ бастуруш сиясәтлирини ташқи дуня арқиму-арқидин «21-әсирдики йеңи қирғинчилиқ» дәп атаватқанда, буниңға қарши садалар барғансери юқири пәллигә чиқишқа башлиди. Америка вә канада һөкүмәтлириниң бу мәсилә һәққидики мәйданиму барғансери кәскин түс елишқа башлиди.

4-Авғуст күни америка ташқи ишлар министири майк помпейо өзиниң тиветтер бетидә видийолуқ нутуқ сөзләп, уйғурлар мәсилисини алаһидә тәкитлиди һәмдә буниң америка-хитай мунасивитидики муһим нуқтиларниң бири икәнликини йәнә бир қетим әскәртти. У сөзидә уйғурлар дуч келиватқан паҗиәләрниң мушу әсирдики әң зор һәқләр дәпсәндичилики икәнликини, шу сәвәбтин өзлириниң уйғур дияридики зулум вә бастуруш һәрикәтлиригә четишлиқ бир қисим шәхсләр вә муәссәсиләргә җаза елан қилғанлиқини, буниңдики асасий муддианиң хитай һөкүмити иҗра қиливатқан мәҗбурий әмгәк, мәҗбурий туғмас қиливетиш дегәндәк бир қатар қәбиһ қилмишлириға чәк қоюш икәнликини баян қилған.

У: «әгәр хитай дуняниң сиясий сәһнисидики паалийәтләргә иштирак қилишни истисә бу хилдики қилмишлардин қолини тартиши лазим,» деди. У йәнә уйғур дияридин келиватқан пахта мәһсулатлириға четишлиқ тәминат зәнҗири мәсилисини алаһидә ойлишиш һәққидә америка вә явропадики сода ширкәтлиригә алаһидә чақириқ қилди.

Шу күнниң өзидә канада парламентиниң әзаси гарнет җинйес өзиниң фейсбук (йүздидар) бетидә канада парламент бинасидики гуваһлиқ бериш йиғинда уйғурлар һәққидә сөзлигән нутқини һәмбәһирлиди. У нутқида уйғурлар дуч келиватқан паҗиәләрниң һәқиқий мәнидики қирғинчилиқ икәнликини бирнәччә җәһәттин чүшәндүрүп: «шәрқий түркистандики вәқәләр ерқий вә миллий алаһидиликни баһанә қилған бир қетимлиқ қирғинчилиқниң мушу минутларда давам қиливатқанлиқини көрсәтмәктә,» деди. Шундақла канада һөкүмитини һазирқидинму күчлүк болған тәдбирләрни елиш арқилиқ «һәргиз қайтиланмайду» дегән тарихий вәдини әмәлгә ашурушқа чақирди.

Пикирләр (0)
Share
Толуқ бәт