Mayk pompéyo: "Uyghurlar uchrawatqan paji'elerge emdi xatime bérish kérek!"

Muxbirimiz eziz
2020-08-05
Élxet
Pikir
Share
Print

Xitay hökümitining Uyghur diyaridiki qattiq qolluq basturush siyasetlirini tashqi dunya arqimu-arqidin "21-Esirdiki yéngi qirghinchiliq" dep atawatqanda, buninggha qarshi sadalar barghanséri yuqiri pellige chiqishqa bashlidi. Amérika we kanada hökümetlirining bu mesile heqqidiki meydanimu barghanséri keskin tüs élishqa bashlidi.

4-Awghust küni amérika tashqi ishlar ministiri mayk pompéyo özining tiwéttér bétide widiyoluq nutuq sözlep, Uyghurlar mesilisini alahide tekitlidi hemde buning amérika-xitay munasiwitidiki muhim nuqtilarning biri ikenlikini yene bir qétim eskertti. U sözide Uyghurlar duch kéliwatqan paji'elerning mushu esirdiki eng zor heqler depsendichiliki ikenlikini, shu sewebtin özlirining Uyghur diyaridiki zulum we basturush heriketlirige chétishliq bir qisim shexsler we mu'essesilerge jaza élan qilghanliqini, buningdiki asasiy muddi'aning xitay hökümiti ijra qiliwatqan mejburiy emgek, mejburiy tughmas qiliwétish dégendek bir qatar qebih qilmishlirigha chek qoyush ikenlikini bayan qilghan.

U: "Eger xitay dunyaning siyasiy sehnisidiki pa'aliyetlerge ishtirak qilishni istise bu xildiki qilmishlardin qolini tartishi lazim," dédi. U yene Uyghur diyaridin kéliwatqan paxta mehsulatlirigha chétishliq teminat zenjiri mesilisini alahide oylishish heqqide amérika we yawropadiki soda shirketlirige alahide chaqiriq qildi.

Shu künning özide kanada parlaméntining ezasi garnét jinyés özining féysbuk (yüzdidar) bétide kanada parlamént binasidiki guwahliq bérish yighinda Uyghurlar heqqide sözligen nutqini hembehirlidi. U nutqida Uyghurlar duch kéliwatqan paji'elerning heqiqiy menidiki qirghinchiliq ikenlikini birnechche jehettin chüshendürüp: "Sherqiy türkistandiki weqeler érqiy we milliy alahidilikni bahane qilghan bir qétimliq qirghinchiliqning mushu minutlarda dawam qiliwatqanliqini körsetmekte," dédi. Shundaqla kanada hökümitini hazirqidinmu küchlük bolghan tedbirlerni élish arqiliq "Hergiz qaytilanmaydu" dégen tarixiy wedini emelge ashurushqa chaqirdi.

Toluq bet