Amérika tashqi ishlar ministiri mayk pompéyo xitay tehditige qarshi tedbir éliwatqanliqini bildürdi

Ixtiyariy muxbirimiz jewlan
2020-09-02
Élxet
Pikir
Share
Print
Amérika tashqi ishlar ministiri mayk pompéyo ependi tashqi ishlar ministirliqida ötküzülgen axbarat élan qilish yighinida sözlewatqan körünüsh. 2020-Yili 5-awghust, washin'gton.
Amérika tashqi ishlar ministiri mayk pompéyo ependi tashqi ishlar ministirliqida ötküzülgen axbarat élan qilish yighinida sözlewatqan körünüsh. 2020-Yili 5-awghust, washin'gton.
AP

Amérika tashqi ishlar ministiri mayk pompéyo 2-séntebir söz qilip, xitay kompartiyesidin kéliwatqan tehdit heqqide toxtaldi we uninggha qarshi tedbir éliwatqanliqini bildürdi.

Mayk pompéyo sözide xitayni tilgha élip, mundaq dédi: "Tramp hökümiti xitay bilen bolghan munasiwitini amérikigha qandaq mu'amile qilin'ghan bolsa, uninggha mas halda inkas qaturidighan yolgha sélishqa tirishiwatidu. Xitay kompartiyesi chet ellik diplomatlarning amérikadiki pa'aliyetlirige tosqunluq qiliwatidu. Bolupmu xitay amérikadiki aliy mektepler, taratqular we ammiwi alaqe wasitilirige singip kirip, amérikaliq diplomatlarning normal ijtima'iy alaqiliridimu xitay puqraliri bilen uchrishishigha yol qoymaywatidu."

Mayk pompéyo yene mundaq dédi: "Bügün men shuni jakarlaymenki, amérika tashqi ishlar ministirliqi xitay diplomatlirining amérikadiki aliy mektepler we yerlik hökümet emeldarliri bilen ötküzidighan pa'aliyetlirige ruxset alidighan méxanizmini qurup chiqti. Kéyinki qedemde biz barliq xitay elchixaniliri we konsulxanilirining ijtima'iy alaqe hésablirini éniqlap chiqimiz."

Mayk pompéyo sözide yene, amérika aliy mektep ijra'iye komitétining yéqinda hökümetke mektup yollap, xitay kompartiyesining amérika aliy mektepliridiki kishilik hoquq, ilmiy erkinlikke tehdit salghanliqi, aliy mekteplerge i'ane qilghan pulida qanunsiz qilmishlarning barliqi, chet ellik oqughuchilargha tehdit salghanliqi, eqliy mülük hoquqini oghrilighanliqi dégendek qilmishlarni melum qilghanliqini éytti.

U axirida xitay kompartiyesige qoyulidighan jaza tedbirliri heqqidimu toxtaldi.

U mundaq dédi: "Soda ministirliqining tizimlikide kishilik hoquqqa tajawuz qilish, herbiy soda we bashqa jinayetlerge chétishliq xitay shirketliri bar. Xitayning chong shirketlirining amérika pay chéki baziridiki qilmishimu chektin éship ketti. Biz xitaydiki bezi shirket we shexslerge jaza yürgüzüsh arqiliq xitay kompartiyesining kéngeymichilikini chekleymiz".

Mayk pompéyo sözide yene xitayning qoshna döletlerge tehdit séliwatqanliqini, hindistan bilen xitay otturisidiki chégra toqunushining tinch yol bilen hel bolushini ümid qilidighanliqini bildürdi.

Toluq bet