Майк помпейо явропа иттипақиниң кишилик һоқуқ җазаси һәққидики лайиһәсини алқишлиди

Мухбиримиз әзиз
2020-12-08
Share

Явропа иттипақиниң дуня миқясидики кишилик һоқуқ дәпсәндичиликини җазалашни баш нишан қилған йеңи лайиһиси һәр саһәниң, җүмлидин америка ташқи ишлар министири майк помпейониң қизғин алқишиға еришти. У америка ташқи ишлар министирлиқиниң тор бетидә елан қилған баянатида "хәлқара кишилик һоқуқ хатирә күнидә явропа иттипақиниң бу лайиһәни қобул қилғанлиқи бөсүш характерлик бир қәдәм. Бу нөвәттики кишилик һоқуқни қоғдаш һәрикитигә йеңи күч қошиду" деди.

Майк помпейониң көрситишичә, явропа иттипақиниң бу қарарни елиши өз нөвитидә йәнә һәрқайси әза дөләтләрни кишилик һоқуқ дәпсәндичилики билән мәшғул болған дөләтләрни җавабкарлиққа тартиш имканийитигә игә қилидикән. Техиму муһими нөвәттики америка, канада вә әнглийә иҗра қиливатқан кишилик һоқуқ дәпсәндичилирини чәкләшкә йеңи күч қошидиған болуп, бу саһәдики дуняви бирликсәпниң һасил болушида зор әһмийәткә игә икән. Шуңа майкил помпейо явропа иттипақини тезрәк бу һәқтики ахирқи қарарни елишқа дәвәт қилди.

У өзиниң тиветтир бетидиму бу һәқтә мәлумат берип нөвәттә хитай, бирма, шималий корейә қатарлиқ диктатора дөләтләрниң "хәлқара диний әркинлик қанун лайиһәси" гә хилап һалда диний һәқләрни аяқ-асти қиливатқанлиқини әйиблиди. Шуниңдәк техиму көп дөләтләрниң бу сәпкә қошулушиға тәшна икәнликини билдүрди.

Америка ташқи ишлар министирлиқи уйғурларниң кишилик һоқуқлириниң аяқ-асти болуш мәсилисигә йеқиндин көңүл бөлүватқан болуп, техи йеқинда өзлириниң тор бетидә мәхсус уйғурлардики кишилик һоқуқ дәпсәндичиликигә мунасивәтлик барчә учурларни бир йәргә топлиған иди. Үн-син материяллири билән бейитилған бу тармақ бәттә уйғурларниң бешиға қандақ күнләрниң келиватқанлиқи толиму җанлиқ тәсвирләнгән болуп, уйғурларниң әһвали әң тәпсилий вә мукәммәл баян қилинған тор бети, дәп қаралмақтикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт