Mayk pompéyo: “Xitay kompartiyesi gherb démokratiyesi yüzliniwatqan eng halqiliq xewp”

Amérika tashqi ishlar ministiri mayk pompéyo xitay kompartiyesini gherb démokratiyesi yüzliniwatqan “Eng halqiliq xewp” dep körsetti.

Firansiye agéntliqining bu heqtiki xewiridin qarighanda, mayk pompéyo bu sözlerni 30-yanwar küni en'gliye tashqi ishlar ministiri dominik ra'ab bilen élip barghan uchrishishi dawamida qilghan.

U sözide gherb démokratik pirinsiplirining xitayning tehditige uchrawatqanliqini eskertip “Xitay kompartiyesi hazirqi dewrdiki eng halqiliq xewp bolup otturigha chiqti. Gherbtiki ittipaqdashlar choqum kéyinki esirning gherbning démokratik prinsipliri asasida idare qilinishigha kapaletlik qilishimiz kérek,” dégen.

Amérika hökümiti en'gliye qatarliq yawropa döletlirini xitay bilen uchur téxnikasi saheside hemkarlashmasliq, bolupmu xu'awéyning 5G téxnikasini ishletmeslik heqqide qattiq agahlandurghan bolsimu, en'gliye terep xu'awéy shirkiti bilen 5G téxnikasida “Cheklik da'iride” hemkarlishidighanliqini jakarlighan.

Amérika tashqi ishlar ministiri mayk pompéyo axbaratqa qilghan sözide yene amérikaning en'gliye bilen kéyinki bir ewlad uchur téxnikasining bixeterliki üchün hemkarlishidighanliqini bildürgen.