Майк помпейо абликим йүсүпниң қандақ елип келингәнликини ашкарилиди

Мухбиримиз әркин
2019-09-16
Елхәт
Пикир
Share
Принт

Америка ташқи ишлар министири майк помпейо америкадики бир аяллар тәшкилатиниң йиғинида нутуқ сөзләп, уйғур мусапири абликим йүсүпниң америкиға елип келинишиниң ички әһвалини ашкарилиди. Майк помпейониң билдүрүшичә, шу вақитта америка нурғун дөләтләр билән алақиләшкән болсиму, лекин бу дөләтләр абликим йүсүпни қобул қилишни яки униңға вақитлиқ болсиму панаһлиқ беришни рәт қилған.

Майк помпейо өткән җүмә күни «америка үчүн әндишилик аяллар» намлиқ аяллар тәшкилатниң чүшлүк зияпитидә нутуқ сөзлигәндә диний әркинлик һәққидә тохтилип, бу вәқәни тилға алған. У, диний әркинликниң «тартивелишқа болмайдиған һәқ-һоқуқ» икәнлики, бу мәсилә ташқи ишлар министирлиқиниң әң муһим хизмити икәнликини, абликим йүсүпниң әһвали буниңға мисал типик бир вәқә икәнликини тәкитлигән. У абликим йүсүпниң қатардин хитайға қайтурулуштәк һалқилиқ бир минутта иҗтимаий таратқуда ярдәм чақириқи елан қилғанлиқи, буниң билән ташқи ишлар министирлиқиниң һәрикәткә өтүп, дохадики америка әлчихана хадимлириниң униң хитайға қайтурулушини тосуп қелиш үчүн қатар һөкүмити билән мукәммәл дипломатик учришишларни елип барғанлиқини билдүргән.

Майк помпейониң қәйт қилишичә, америка б д т мусапирлар мәһкимиси арқилиқ бу вәқәни хәлқара җәмийәткә билдүрүп, америкиниң һәр қайси дөләтләрдики әлчиханилири абликим йүсүпкә өткүнчи болсиму, панаһлиқ җай издигән. Лекин, һечким хитайни рәнҗитип қоюшни халимиған. Бу дөләтләр абликим йүсүпни қобул қилишни рәт қилған. Лекин помпейо сөзидә бу дөләтләрниң исмини тилға алмиған. У пәқәт «шуниң билән бизгә бир таллаш йоли қалди. Биз шу сәвәблик уни америкиға елип кәлдуқ» дегән. Майк помпейо сөзидә йәнә бу вәқәниң америка таратқулирида бәк диққәт қозғимиғанлиқи, лекин бир сәвәб түпәйли бу вәқәни бу сорунда тилға елишни тоғра тапқанлиқини билдүрүп, «чүнки, бу америкиниң диний әркинликни қоғдаш үчүн бүгүн йетип барған нуқтисини көрситиду» дегән. Хотәнлик уйғур мусапири абликим йүсүп бу йил 2-авғуст күни доха айродромида хәлқараға өзини қутқузуп қелиш чақириқи елан қилип, 6‏-авғуст күни америкиға елип келингәниди.

Пикирләр (0)
Share
Толуқ бәт