Mayk pompéyo ablikim yüsüpning qandaq élip kélin'genlikini ashkarilidi

Muxbirimiz erkin
2019-09-16
Élxet
Pikir
Share
Print

Amérika tashqi ishlar ministiri mayk pompéyo amérikadiki bir ayallar teshkilatining yighinida nutuq sözlep, Uyghur musapiri ablikim yüsüpning amérikigha élip kélinishining ichki ehwalini ashkarilidi. Mayk pompéyoning bildürüshiche, shu waqitta amérika nurghun döletler bilen alaqileshken bolsimu, lékin bu döletler ablikim yüsüpni qobul qilishni yaki uninggha waqitliq bolsimu panahliq bérishni ret qilghan.

Mayk pompéyo ötken jüme küni "Amérika üchün endishilik ayallar" namliq ayallar teshkilatning chüshlük ziyapitide nutuq sözligende diniy erkinlik heqqide toxtilip, bu weqeni tilgha alghan. U, diniy erkinlikning "Tartiwélishqa bolmaydighan heq-hoquq" ikenliki, bu mesile tashqi ishlar ministirliqining eng muhim xizmiti ikenlikini, ablikim yüsüpning ehwali buninggha misal tipik bir weqe ikenlikini tekitligen. U ablikim yüsüpning qatardin xitaygha qayturulushtek halqiliq bir minutta ijtima'iy taratquda yardem chaqiriqi élan qilghanliqi, buning bilen tashqi ishlar ministirliqining heriketke ötüp, doxadiki amérika elchixana xadimlirining uning xitaygha qayturulushini tosup qélish üchün qatar hökümiti bilen mukemmel diplomatik uchrishishlarni élip barghanliqini bildürgen.

Mayk pompéyoning qeyt qilishiche, amérika b d t musapirlar mehkimisi arqiliq bu weqeni xelq'ara jem'iyetke bildürüp, amérikining her qaysi döletlerdiki elchixaniliri ablikim yüsüpke ötkünchi bolsimu, panahliq jay izdigen. Lékin, héchkim xitayni renjitip qoyushni xalimighan. Bu döletler ablikim yüsüpni qobul qilishni ret qilghan. Lékin pompéyo sözide bu döletlerning ismini tilgha almighan. U peqet "Shuning bilen bizge bir tallash yoli qaldi. Biz shu seweblik uni amérikigha élip kelduq" dégen. Mayk pompéyo sözide yene bu weqening amérika taratqulirida bek diqqet qozghimighanliqi, lékin bir seweb tüpeyli bu weqeni bu sorunda tilgha élishni toghra tapqanliqini bildürüp, "Chünki, bu amérikining diniy erkinlikni qoghdash üchün bügün yétip barghan nuqtisini körsitidu" dégen. Xotenlik Uyghur musapiri ablikim yüsüp bu yil 2-awghust küni doxa ayrodromida xelq'aragha özini qutquzup qélish chaqiriqi élan qilip, 6‏-awghust küni amérikigha élip kélin'genidi.

Toluq bet