Майк помпейо: «хитайни шинҗаңдики халиғанчә тутқун қилинған барлиқ кишиләрни қоюп беришкә чақиримиз»

Мухбиримиз әркин
2019-10-09
Елхәт
Пикир
Share
Принт

Америка ташқи ишлар министири майк помпейо 8‏-өктәбир күни твиттерда баянат елан қилип, хитай һөкүмитини уйғур районидики қопал назарәт системиси вә бастурушини бикар қилишқа, халиғанчә тутқун қилинған барлиқ тутқунларни қоюп беришқа чақирған.

Майк помпейо бу чақириқини америка ташқи ишлар министирлиқи 8‏-өктәбир күни хитайниң уйғур аптоном районида уйғур, қазақ, қирғиз вә башқа мусулман милләтләргә қарши елип бериватқан қаттиқ бастуруш һәрикитидә җавабкарлиқим бар яки униңға һәмкарлашқан компартийә вә һөкүмәт әмәлдарлириға виза ембаргоси қойидиғанлиқини җакарлиған күни оттуриға қойған.

Америка ташқи ишлар министирлиқиниң виза имбаргоси америка сода министирлиқи уйғур аптоном районлуқ җ х назаритини өз ичигә алған райондики 20 дәк йәрлик җ х идарисиға вә улар билән һәмкарлашқан 8 хитай технилогийә ширкитини қара тизимликкә алғанлиқини елан қилип арқидинла елан қилинғаниди.

Майк помпейо твиттердики чақириқида мундақ дегән: «хитай шинҗаңда бир милйондин артуқ мусулманни мәҗбури тутқун қилип, уларниң дини вә мәдәнийитини вәһшиянә, системилиқ һәрикәт арқилиқ йоқатмақта. Хитай өзиниң қопал назарәт системиси вә бастурушиға хатимә бериши, халиғанчә тутқун қилинған барлиқ тутқунларни қоюп бериши вә чәтәлдики хитайлиқ мусулманларға зорлуқ қилишни тохтитиши керәк.»

Америка ташқи ишлар министирлиқи вә сода министирлиқиниң елан қилған қарари хитайниң қаттиқ наразилиқини қозғиған.

Шинхуа агентлиқи 9‏-өктәбир мақалә елан қилип, хитайниң һәркитини ақлиған, американиң һәркитини «хитайниң ички ишлириға арилашқанлиқ» дәп әйиблигән. Шинхуа агентлиқиниң илгири сүрүшичә, «шинҗаңда америка ейтқандәк диний вә кишилик һоқуқ мәсилиси мәвҗут әмәс» икән «шинҗаңниң әсәбийлик вә террорлуққа қарши қолланған тәдбири террорлуқ вә әсәбийликниң мәнбәсининиң алдини елишни мәқсәт қилған» икән.

Пикирләр (0)
Share
Толуқ бәт