Mayk pompéyo: "Xitayni shinjangdiki xalighanche tutqun qilin'ghan barliq kishilerni qoyup bérishke chaqirimiz"

Muxbirimiz erkin
2019-10-09
Élxet
Pikir
Share
Print

Amérika tashqi ishlar ministiri mayk pompéyo 8‏-öktebir küni twittérda bayanat élan qilip, xitay hökümitini Uyghur rayonidiki qopal nazaret sistémisi we basturushini bikar qilishqa, xalighanche tutqun qilin'ghan barliq tutqunlarni qoyup bérishqa chaqirghan.

Mayk pompéyo bu chaqiriqini amérika tashqi ishlar ministirliqi 8‏-öktebir küni xitayning Uyghur aptonom rayonida Uyghur, qazaq, qirghiz we bashqa musulman milletlerge qarshi élip bériwatqan qattiq basturush herikitide jawabkarliqim bar yaki uninggha hemkarlashqan kompartiye we hökümet emeldarlirigha wiza émbargosi qoyidighanliqini jakarlighan küni otturigha qoyghan.

Amérika tashqi ishlar ministirliqining wiza imbargosi amérika soda ministirliqi Uyghur aptonom rayonluq j x nazaritini öz ichige alghan rayondiki 20 dek yerlik j x idarisigha we ular bilen hemkarlashqan 8 xitay téxnilogiye shirkitini qara tizimlikke alghanliqini élan qilip arqidinla élan qilin'ghanidi.

Mayk pompéyo twittérdiki chaqiriqida mundaq dégen: "Xitay shinjangda bir milyondin artuq musulmanni mejburi tutqun qilip, ularning dini we medeniyitini wehshiyane, sistémiliq heriket arqiliq yoqatmaqta. Xitay özining qopal nazaret sistémisi we basturushigha xatime bérishi, xalighanche tutqun qilin'ghan barliq tutqunlarni qoyup bérishi we chet'eldiki xitayliq musulmanlargha zorluq qilishni toxtitishi kérek."

Amérika tashqi ishlar ministirliqi we soda ministirliqining élan qilghan qarari xitayning qattiq naraziliqini qozghighan.

Shinxu'a agéntliqi 9‏-öktebir maqale élan qilip, xitayning herkitini aqlighan, amérikaning herkitini "Xitayning ichki ishlirigha arilashqanliq" dep eyibligen. Shinxu'a agéntliqining ilgiri sürüshiche, "Shinjangda amérika éytqandek diniy we kishilik hoquq mesilisi mewjut emes" iken "Shinjangning esebiylik we térrorluqqa qarshi qollan'ghan tedbiri térrorluq we esebiylikning menbesinining aldini élishni meqset qilghan" iken.

Toluq bet