Майк помпейо америка һөкүмитиниң уйғур мәсилисини давамлиқ тәкитләйдиғанлиқини билдүрди

Мухбиримиз ирадә
2019-10-10
Елхәт
Пикир
Share
Принт

Америка ташқи ишлар министири майк помпейо 9-өктәбир күнидики сөзидә уйғурлар һәққидә тохтилип «хитай һөкүмитиниң хитайниң ғәрбидики уйғур қатарлиқ мусулманларға йүргүзүватқини ғайәт зор инсан һәқлири дәпсәндичиликидур.

Вашингтон бу мәсилини давамлиқ оттуриға қойиду» дегән. У юқириқи сөзләрни америкадики «PBS» телевизийәсиниң зияритини қобул қилғанда қилған.

Майк помпейо йәнә мундақ дегән: «бу пәқәт ғайәт зор кишилик һоқуқ дәпсәндичилики болупла қалмай, у йәнә хитайниң өзигә вә пүтүн дуняниң мәнпәәтигә зиянлиқ (хилап) бир һәрикәттур».

У мухбирниң «уйғур елидики бу еғир вәзийәттә хитай рәиси ши җинпиңниң мәсулийити барму,» дәп сориған соалиға «ши җинпиңниң бу дөләтни худди танка әтритиниң рота командиридәк яки бир кичик ширкәттәк вә яки сизниң намиңизда йүз бәргән барлиқ ишларда мәсулийити бар бир дөләттәк башқуруватиду,» дәп җаваб бәргән.

Трамп һөкүмити 7-өктәбир қарар чиқирип, уйғур қатарлиқ милләтләрниң кишилик һоқуқ дәпсәндичиликигә четилған 28 хитай муәссәсәсини қара тизимликкә киргүзгән иди. Арқидинла америка ташқи ишлар министирлиқи уйғур аптоном районида уйғур, қазақ қатарлиқ мусулман милләтләргә қарши елип бериватқан қаттиқ бастуруш һәрикитигә қатнашқан яки униңға һәмкарлашқан компартийә вә һөкүмәт әмәлдарлириға виза ембаргоси қойидиғанлиқини җакарлиған. Америка һөкүмитиниң юқириқи қарари хәлқарадики кишилик һоқуқ органлири вә уйғурларниң вәзийитини йеқиндин көзитип келиватқан һәрсаһә кишиләрниң қизғин алқишиға еришти.

Хитай тәрәп болса америкиниң қараридин нарази болған. Ройтерс агентлиқиниң хәвиригә қариғанда, хитайниң америкида турушлуқ әлчиханиси баянат елан қилип, америкиниң виза чәклимисигә наразилиқ билдүрүш билән биргә йәнә уйғур елида кишилик һоқуқ дәпсәндичиликиниң йоқлуқини илгири сүргән.

Пикирләр (0)
Share
Толуқ бәт