Mayk pompéyo amérika hökümitining Uyghur mesilisini dawamliq tekitleydighanliqini bildürdi

Muxbirimiz irade
2019-10-10
Élxet
Pikir
Share
Print

Amérika tashqi ishlar ministiri mayk pompéyo 9-öktebir künidiki sözide Uyghurlar heqqide toxtilip "Xitay hökümitining xitayning gherbidiki Uyghur qatarliq musulmanlargha yürgüzüwatqini ghayet zor insan heqliri depsendichilikidur.

Washin'gton bu mesilini dawamliq otturigha qoyidu" dégen. U yuqiriqi sözlerni amérikadiki "PBS" téléwiziyesining ziyaritini qobul qilghanda qilghan.

Mayk pompéyo yene mundaq dégen: "Bu peqet ghayet zor kishilik hoquq depsendichiliki bolupla qalmay, u yene xitayning özige we pütün dunyaning menpe'etige ziyanliq (xilap) bir herikettur".

U muxbirning "Uyghur élidiki bu éghir weziyette xitay re'isi shi jinpingning mes'uliyiti barmu," dep sorighan so'aligha "Shi jinpingning bu döletni xuddi tanka etritining rota komandiridek yaki bir kichik shirkettek we yaki sizning namingizda yüz bergen barliq ishlarda mes'uliyiti bar bir dölettek bashquruwatidu," dep jawab bergen.

Tramp hökümiti 7-öktebir qarar chiqirip, Uyghur qatarliq milletlerning kishilik hoquq depsendichilikige chétilghan 28 xitay mu'essesesini qara tizimlikke kirgüzgen idi. Arqidinla amérika tashqi ishlar ministirliqi Uyghur aptonom rayonida Uyghur, qazaq qatarliq musulman milletlerge qarshi élip bériwatqan qattiq basturush herikitige qatnashqan yaki uninggha hemkarlashqan kompartiye we hökümet emeldarlirigha wiza émbargosi qoyidighanliqini jakarlighan. Amérika hökümitining yuqiriqi qarari xelq'aradiki kishilik hoquq organliri we Uyghurlarning weziyitini yéqindin közitip kéliwatqan hersahe kishilerning qizghin alqishigha érishti.

Xitay terep bolsa amérikining qararidin narazi bolghan. Roytérs agéntliqining xewirige qarighanda, xitayning amérikida turushluq elchixanisi bayanat élan qilip, amérikining wiza cheklimisige naraziliq bildürüsh bilen birge yene Uyghur élida kishilik hoquq depsendichilikining yoqluqini ilgiri sürgen.

Toluq bet