Uyghur aptonom rayonluq hökümet da'iriliri mayk pompéyyoning Uyghurlar heqqidiki sözlirini tenqid qildi

Muxbirimiz erkin
2019-11-11
Élxet
Pikir
Share
Print

Uyghur aptonom rayonluq hökümet 11‏-noyabir küni bayanat élan qilip, amérika tashqi ishlar ministiri mayk pompéyoning yéqinda qilghan Uyghurlar heqqidiki sözlirini tenqid qilghan.

Bayanatta ilgiri sürüshiche, chet'eldiki Uyghur pa'aliyetchiler we lagér shahitlirining rayondiki a'ile ezaliri héchqandaq parakendichilikke uchrimay, normal yashimaqta iken. Bu Uyghur aptonom rayonluq hökümetning tunji qétim amérika tashqi ishlar ministirining sözlirige inkas qayturushidur.

Mayk pompéyo ötken hepte xitay hökümitining chet'eldiki Uyghur pa'aliyetchi we lagér shahitlirining a'ile ezalirigha parakendichilik séliwatqanliqi, xitayning bu qilmishini toxtitishi kéreklikini tekitligen. Mayk pompéyo sözide amérikadiki yash Uyghur pa'aliyetchiliridin férqet jawdet, arafat erkin, shundaqla lagér shahiti zumret dawutni alahide tilgha alghan. U xitay da'irilirining bu kishilerning a'ile ezalirigha parakendichilik sélip kéliwatqanliqi, zumret dawutning dadisining bu xil parakendichilikning qurbanigha aylan'ghanliqi, uning yéqinda wapat bolghanliqini alahide tekitligen idi. Lékin Uyghur aptonom rayonluq hökümet bayanatida arafat erkin bilen férqet jawdetning anisining lagérgha qamalghanliqi, zumret dawutning dadisining parakendichilikke uchrap, wapat bolghanliqini ret qilghan. Emma arafat erkinning dadisining qamaqqa höküm qilin'ghanliqini étirap qilghan. Bayanatta erkin tursunning "Zorawan térrorluq herikitige qatnashqanliqi seweblik qamaq jazasigha höküm qilin'ghanliqi" ilgiri sürülgen.

Ili téléwiziye istansisining rézhissori, tonulghan medeniyet pa'aliyetchisi erkin tursun 2018‏-yili 3‏-ayda tutqun qilinip, derhal késiwétilgen idi. Uyghur aptonom rayonluq hökümetning bayanatida mayk pompéyo "Diniy we kishilik hoquq qalpiqini kiyiwélip, shinjanggha qara chaplash, heqiqiy ehwal burmilan'ghan asassiz sözlerni qilish" bilen eyiblen'gen. Xitay hökümiti özlirining 3 milyondek Uyghurni lagérlargha qamighanliqini ret qilip, kishilerge qarita radikalliqqa qarshi "Kespiy terbiye‏" élip bériwatqanliqini tekitlep keldi.

Toluq bet