“пул һәптилики” журнили: америка-хитай оттурисида сода уруши әмди бағланған болуши мумкин

• Мухбиримиз әркин
  2019-05-03

Ақ сарай, америка-хитай сода сөһбитиниң нәтиҗисигә қарап, икки дөләт рәһбәрлириниң учришиш-учрашмаслиқини қарар қилидиғанлиқини билдүргән. Америка таратқулириниң 3‏-май күни билдүрүшичә, америка‏-хитай сода вәкиллири келәр һәптә вашингтонда учришип, ахирқи қетимлиқ сода сөһбити өткүзгәндин кейин, президент трамп билән хитай рәиси ши җинпиң учришиш-учрашмаслиқни, учрашса қачан учришишни қарар қилидикән. Америка хитай сода сөһбити чаршәнбә күни бейҗиңда өткүзүлгән иди.

Ақ сарайниң баянатчиси сандерс 2‏-апрел сода сөһбитиниң илгириләшкә еришкәнлики, америка тәрәпниң “икки дөләт рәһбири учришиши мумкин”, дәп қарайдиғанлиқи, әмма буниң әмәлгә ешиш-ашмаслиқи, қачан көрүшүши келәр һәптә өткүзүлидиған сөһбәттин кейин бекитилидиғанлиқини билдүргән. Америка сода уюшмисиниң ройтерс агентлиқиға билдүрүшичә, америка хитай базириға киришта хитай тәрәп бурун оттуриға қойған тәклиптинму чоң имканийәткә еришкән болуши мумкин икән. Лекин бәзи анализчилар америка-хитай сода келишими имзалиған тәқдирдиму сода урушиниң ахирлашмайдиғанлиқини илгири сүрмәктә.

Америкадики “пул һәптилики” тор журнилида 3‏-май күни елан қилинған бир мақалидә, америка-хитай оттурисидики сода урушиниң әмди башланғанлиқи илгири сүрүлгән. Мақалидә қәйт қилинишичә, қисқа муддәттә һәр икки тәрәп өзлириниң ички сиясий вәзийити сәвәблик келишим һасил қилиш тәрәпдари болсиму, лекин келишим узун муддәткичә җиддийликни пәсәйтмәйдикән. Мақалидә, мәйли келишим һасил қилинсун яки қилинмисун, содидики җиддийликни нурғун амилларниң кәлтүрүп чиқарғанлиқи, бу амилларниң бир келишим биләнла һәл болмайдиғанлиқи билдүрүлгән. Мақалидә тәкитлинишичә, американиң нәзиридә хитай узундин бери содида адаләтсизлик қилип кәлгән болуп, бу трампниң президентлиққа сайлинишидики муһим сәвәбләрниң бири икән. Мақалидә, әқлий мүлк һоқуқидәк мурәккәп мәсилиләрниң һәрқандақ бир келишим билән һәл болуп кәтмәйдиғанлиқи әскәртилип, “узун муддәттә җиддийлик қайта өткүрләшсә һәйран қалмаслиқ керәк” дейилгән.