"Pul heptiliki" zhurnili: amérika-xitay otturisida soda urushi emdi baghlan'ghan bolushi mumkin

Muxbirimiz erkin
2019-05-03
Élxet
Pikir
Share
Print

Aq saray, amérika-xitay soda söhbitining netijisige qarap, ikki dölet rehberlirining uchrishish-uchrashmasliqini qarar qilidighanliqini bildürgen. Amérika taratqulirining 3‏-may küni bildürüshiche, amérika‏-xitay soda wekilliri kéler hepte washin'gtonda uchriship, axirqi qétimliq soda söhbiti ötküzgendin kéyin, prézidént tramp bilen xitay re'isi shi jinping uchrishish-uchrashmasliqni, uchrashsa qachan uchrishishni qarar qilidiken. Amérika xitay soda söhbiti charshenbe küni béyjingda ötküzülgen idi.

Aq sarayning bayanatchisi sandérs 2‏-aprél soda söhbitining ilgirileshke érishkenliki, amérika terepning "Ikki dölet rehbiri uchrishishi mumkin", dep qaraydighanliqi, emma buning emelge éshish-ashmasliqi, qachan körüshüshi kéler hepte ötküzülidighan söhbettin kéyin békitilidighanliqini bildürgen. Amérika soda uyushmisining roytérs agéntliqigha bildürüshiche, amérika xitay bazirigha kirishta xitay terep burun otturigha qoyghan tekliptinmu chong imkaniyetke érishken bolushi mumkin iken. Lékin bezi analizchilar amérika-xitay soda kélishimi imzalighan teqdirdimu soda urushining axirlashmaydighanliqini ilgiri sürmekte.

Amérikadiki "Pul heptiliki" tor zhurnilida 3‏-may küni élan qilin'ghan bir maqalide, amérika-xitay otturisidiki soda urushining emdi bashlan'ghanliqi ilgiri sürülgen. Maqalide qeyt qilinishiche, qisqa muddette her ikki terep özlirining ichki siyasiy weziyiti seweblik kélishim hasil qilish terepdari bolsimu, lékin kélishim uzun muddetkiche jiddiylikni peseytmeydiken. Maqalide, meyli kélishim hasil qilinsun yaki qilinmisun, sodidiki jiddiylikni nurghun amillarning keltürüp chiqarghanliqi, bu amillarning bir kélishim bilenla hel bolmaydighanliqi bildürülgen. Maqalide tekitlinishiche, amérikaning neziride xitay uzundin béri sodida adaletsizlik qilip kelgen bolup, bu trampning prézidéntliqqa saylinishidiki muhim seweblerning biri iken. Maqalide, eqliy mülk hoquqidek murekkep mesililerning herqandaq bir kélishim bilen hel bolup ketmeydighanliqi eskertilip, "Uzun muddette jiddiylik qayta ötkürleshse heyran qalmasliq kérek" déyilgen.

Toluq bet