Xitayning yer asti bankiliri torda pul yuyush bilen shughullanmaqtiken

Washin'gtondin muxbirimiz jewlan teyyarlidi
2024.04.24

Xitaydiki bezi yer asti bankilar pul yuyush bilen shughulliniwatqan bolup, ular dölet halqighan jinayet guruhlirining eng bashta tallaydighan pul-mu'amile dokari bolup qalghan.

“Iqtisadshunas” torining 22-aprél bergen xewiride déyilishiche, amérika tashqi ishlar ministiri antoni bilinkén béyjing we shangxeyde élip baridighan 3 künlük ziyariti dawamida xitay hökümitidin rusiyege herbiy qoral we xam eshya teminleshni toxtitishni telep qilish bilen birge, pul yuyush qilmishlirigha zerbe bérishni telep qilidiken.

Xewerde éytilishiche, yéqinqi yillardin buyan xitayning yer asti intérnét alaqisi we yéngi tor téxnikisining yardimi bilen pul yuyush qilmishliri éghirlashqan bolup, pul yuyush meshghulatini bir nechche minut ichidila tamamlaydighan halet shekillen'gen. Dunyaning her qaysi jayliridiki xelq'ara jinayet guruhliri bu imkaniyettin paydilinip kelgen؛ shundaq qilip, xitayning yer asti bankiliri ularni pul-mu'amile mulazimiti teminleydighan eng chong bankérlar bolup qalghan. Ularni basturush amérika bilen xitayning dölet derijilik söhbitidiki muhim témilardin birige aylan'ghan.

Xewerde körsitilishiche, 2023-yildin 11-aydin 12-ayghiche amérikada féntanil bilen ölgen adem 105 minggha yetken bolup, méksikadin kiridighan bu zeherning sodisi xelq'ara jinayet guruhlirining qolida iken, halbuki, xitayning yer asti bankiliri bu ishta hel qilghuch rol oynimaqta iken. Uningdin bashqa, asiya jinayet guruhi, bolupmu xitay jinayet guruhi yawropaghimu tehdit shekillendürgen, ularning jinayiti qimardin tartip zeher sodisi we bitkoyin'ghiche chétilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.