Awstraliyede “Uyghur longqisi” ni talishish putbol musabiqisi ötküzülgen

Awstraliye muhajirettiki Uyghur jama'iti köprek olturaqlashqan döletlerning biri. Bu elge 1970-yillarning axiriliridin buyan türlük sewebler bilen wetenni terk etken bir qisim Uyghur we bashqa qérindash türkiy xelqler köchüp kélip, tedrijiy halda öz jama'itini hasil qilghan.

Igilinishiche, awstraliyediki Uyghur jama'iti özliri qurup chiqqan teshkilatlirining yétekchilikide muhajirettiki Uyghur dewasi we özlirining jama'etlik ishliri üchün pa'al heriketlerde bolup kelmektiken.

Awstraliyediki Uyghurlar yash ewladlarning medeniyet we tenterbiye pa'aliyetlirini janlandurush, Uyghur milliy kimlikini kücheytish meqsitide 2006-yilidin buyan “Uyghur longqisi” ni talishish putbol musabiqisini uyushturup kelgen.

Bu yilliq “Uyghur longqisi” ni talishish putbol musabiqisi 12-ayning 24-küni awstraliyening mélborn shehiride bashlan'ghan bolup, musabiqige sidnéy, mélborn we adélaydtiki Uyghur yash-ösmürliridin teshkillen'gen 3 komanda qatnashqan. Musabiqe 25-dékabir küni axirlishidiken.

Awstraliye Uyghur  jem'iyitining re'isi memtimin elaning ilgiri sürishiche, Uyghur yashlirining öz-ara chüshinishini meqset qilghan “Uyghur longqisi” ni talishish putbol musabiqisi awstraliyediki Uyghur jama'itining ijtima'iy hayatidiki muhim bir sehipe bolup kelmektiken.