Җу хәйлүн қағилиқ наһийисидики диний затлар билән учрашти

Уйғур аптоном районлуқ парткомниң муавин секретари, сиясий қанун комитетиниң секретари җу хәйлүн 25-март күни уйғур дияриниң җәнубидики тинчсиз наһийәләрниң бири дәп қарилип келиватқан қағилиқ наһийисигә берип, бу йәрдики ислам дини затлири билән учришип сөһбәтләшкән.

Тәңритағ ториниң учуридин мәлум болушичә,җу хәйлүн қағилиқ наһийисидики ислам дини затлириниң хитай дөләт рәис ши җинпиңниң пүтүн мәмликәтлик дини хизмәт йиғинида сөзлигән сөзиниң роһини өгиниш үмидини билдүргән.

У сөзидә дини затлардин, “ислам дининиң вәтәнпәрвәрлик, тинчлиқ, иттипақлиқ вә яхшилиқ қатарлиқ дини әқидилирини толуқ шәрһләш арқилиқ, аммини тоғра ишиниш вә тоғра һәрикәттә болушқа, оттура йолда чиң туруп, әсәбийликкә қарши турушқа вә "үч хил күч"ләргә қарши өзлүкидин күрәш қилишқа йетәкләш”ни тәләп қилған шуниңдәк йәнә дини затларниң башламчилиқ билән “партийиниң диний хизмәт сияситини әмәлийләштүрүш вә дини хизмәт қанун-мизанлириға қәтий бойсунуши”ни тәкитлигән.

Уйғур аптоном райониниң сиясий вә иҗтимаий муқимлиқ ишлириға мәсул әмәлдари җу хәйлүн бир айдин буян уйғур дияриниң җәнубидики қәшқәр вилайитиниң қәшқәр шәһири, йәкән, йопурға вә башқа наһийәлири һәм қизилсуниң атуш, ақту қатарлиқ җайлирида мәхсус муқимлиқ хизмәтлирини тәкшүрүш вә орунлаштуруш ишлири билән мәшғул болған болуп, у бу қетимқи нишанини қағилиққа қаратқан иди.