Xitay da'iriliri “Xitayning qanun ramkisi we térrorluqqa qarshi turush tedbirliri” namliq aq tashliq kitab élan qilghan

Xitay hökümiti birleshken döletler teshkilatining xitayning kishilik hoquq weziyitige uniwérsal qerellik qarap chiqish yighini échilghan küni bir aq tashliq kitab élan qilip, Uyghur élidiki siyasetlirini aqlighan.

23-Yanwar küni élan qilin'ghan “Xitayning qanun ramkisi we térrorluqqa qarshi turush tedbirliri” namliq bu aq tashliq kitabta töwendiki ibariler orun alghan:

“Térrorluqning qurbani bolush süpiti bilen, xitay uzundin buyan heqiqiy tehditke duch keldi. . . Shinjang xitayning térrorluqqa qarshi turush herikitining muhim nuqtisi.”

Mezkur aq tashliq kitabta yene “Xitay dölet re'isi shi jinping rehberlikidiki térrorluqqa qarshi turush tirishchanliqining rayon'gha bixeterlik we muqimliq élip kelgenliki, muqimliq we xatirjemlik ichide ahalilerning bext tuyghusining éship, kirimining bir qatlan'ghanliqi” ilgiri sürülgen.

Xitay bu nöwet jenwede chaqirilghan xitayning kishilik hoquq xatirisige uniwérsal qerellik qarap chiqish yighinida Uyghur élida “Térrorluqqa qarshi turush” nami astida yolgha qoyghan wehshiylikliri sewebidin qattiq tenqidke duch kelgen idi. Amérika, en'gliye, kanada, gérmaniye we monténigro qatarliq gherb démokratik döletliri xitayni tutup turush lagérlirini bikar qilishqa chaqirghandin sirt, uni b d t kishilik hoquq aliy komissarliqining tewsiyelirige emel qilishqa chaqirghan.

Halbuki, xitay da'iriliri aq tashliq kitabida “Qayta terbiyelesh” dep atiwalghan jaza lagéri tüzümini dawamlashturidighanliqini tekitlep, “Xitay ashqunluqning ziyankeshlikige uchrighanlarni terbiyilesh we eslige keltürüsh xizmetlirige téximu ehmiyet béridu” dégen. Kitabta yene “Bezi döletler qanun bilen idare qilish we kishilik hoquqni qoghdashni bahane qilip, igilik hoquqimizgha dexli-teruz qildi. Bu heriketler dunyaning térrorluqqa qarshi turush tirishchanliqigha éghir tosalghu bolup, hemkarliq asasini ajizlashturdi” dégen ibarilermu orun alghan.