Xitay da'iriliri "Qanunsiz uchur tarqitish" qa chétishliq 13 ademni jazalighan

Muxbirimiz sada
2019-08-07
Élxet
Pikir
Share
Print

Xitay da'iriliri Uyghur aptonom rayonining ürümchi, ghulja, bortala, aqsu we qeshqer qatarliq jaylirida "Qanunsiz uchur tarqitish" qa alaqidar sekkiz tipik délo we uninggha chétishliq 13 ademni jazalighan.

"Tengritagh" torining 7-iyuldiki xewirige qarighanda, yuqiriqi kishiler "Intérnét we bashqa ijtima'iy alaqe supilirida diniy ashqunluq, bölgünchilik we saxta uchur qatarliq mezmunlardiki yéziq, resim, sin körünüshlirini tarqitip we saqlighanliqi" hemde xitayning "Jinayi ishlar qanuni", "Térrorluqqa qarshi turush qanuni", "Amanliq saqlash ishliri boyiche bashqurush we jazalash qanuni" we "Intérnét uchur mulazimitini bashqurush charisi" qatarliq qanun-nizamlargha xilapliq qilghanliqi bilen eyiblen'gen iken.

Mezkur xewerde déyilishiche, bu qétim "Qanunsiz uchur tarqitish" bilen jazalan'ghan 13 kishining üch nepiri Uyghur, 10 nepiri xitay iken. Bularning ikki nepiri "Milletler ara öchmenlikke küshkürtüsh", "Diniy ashqunluqqa munasiwetlik buyumlarni tarqitish" dégen namda jinayi ishlar boyiche toxtitip qoyulghan, yene birige tenqidiy terbiye jazasi bérilgen.

Jinayi ishlar boyiche toxtitip qoyulghan bu ikki Uyghur ghuljidin bolup, biri 19 yash yene biri 35 yash iken. Xewerde ularning bu yil 22-aprél we 11-may künliri özining shexsiy ijtima'iy alaqe supisida "Milletler ara öchmenlikke küshkürtüsh" ke da'ir söz-jümlilerni qilish we "Ashqun idiyeni teshwiq qilidighan süretlik uchurlarni tarqitish" bilen eyiblen'gen.

Melum bolushiche, buningdin ilgirimu xitay da'iriliri Uyghurlarni intérnétta "Qanunsiz uchur tarqatqan" dégen namda jazalighan bolup, bu xitay da'irilirining Uyghur diyarida "Qanunsiz uchur tarqitish" bilen jazalan'ghanliqini élan qilghan 22-türkümdiki tipik délo iken.

Toluq bet