Уйғур елидә 14 киши қанунсиз учур тарқатқан, дәп тутқун қилинған

Хитай даирилири сәйшәнбә күни уйғур елидә қанунсиз учур тарқатқан, дәп бир тәрәп қилинған типик 10 делони елан қилди.

Уйғур аптоном районлуқ җ х назаритиниң йәрлик ахбарат васитилиригә ашкарилишичә, бу йил 10 вә 11‏-айларда бир тәрәп қилинған бу 10 делода 14 киши тутқун қилинған.

Хәвәрдә, тутқунларниң террорлуқ, диний ашқунлуқ, бөлгүнчиликкә даир язма, син, рәсим вә ялған учурларни сақлап вә тарқитип, хитайниң җинайи ишлар, террорлуқ, тор вә учур башқуруш қанунлириға хилаплиқ қилғанлиқини билдүрүлгән. Лекин уйғур кишилик һоқуқ тәшкилатлириниң илгири сүрүшичә, нөвәттә уйғур районида йәрлик хәлқләрниң нормал диний -етиқади, әнәниси, тарихий вә мәдәнийитидики алаһидилик тәрғиб қилинған һәрқандақ рәсим, син язма ашқунлуқ, бөлгүнчилик яки икки йүзлимичилик, дәп қарилип җазаланмақтикән.

“тәңритағ тори” ниң сәйшәнбә күни тартқан хәвиридә көрситилишичә, хотән, ақсу, шихәнзә, чөчәк, үрүмчи, турпан, қумул қатарлиқ җайларда тутқун қилинған юқириқи 14 кишиниң 6 нәпири уйғур, 5 нәпири қазақ, 3 нәпири хитай болуп, улардин 5 уйғур, 4 қазақ рәсмий қолға елинған, қалған 3 нәпәр хитай, бир уйғур вәбир қазақ тутқунға мәмурий тутуп туруш җазаси берилгән.

Рәсмий қолға елинған уйғурларниң 2 си хотәнлик, 2 си ақсулуқ, бири үрүмчилик, қазақларниң бири алтайлиқ, 2 си санҗилиқ бири қумуллуқ икән. Хитай һөкүмити өзиниң уйғур районида елип бериватна һәрикәтлирини ашқунлуққа қарши зөрүр тәдбирләр, дәп көрситип кәлгән болсиму, бирақ кишилик һоқуқ тәшкилатлири хитайниң ашқунлуқни баһанә қилип, уйғурларниң сөз, пикир вә нормал яшаш әркинликини қаттиқ боғуватқанлиқини илгири сүрүп кәлди.