Байинғолин области аталмиш «қара гуруһлар» вә «рәзил күчләр» гә қарши омумий йүзлүк тазилаш һәрикити қозғиған

Мухбиримиз ирадә
2019-03-01
Елхәт
Пикир
Share
Принт

Байинғолин области йеқинда аталмиш «қара гуруһлар» вә «рәзил күчләр» гә қарши омумий йүзлүк тазилаш һәрикити қозғиған.

Байинғолин области бу һәқтә елан қилған уқтурушида мәзкур һәрикәтни хәлқниң қоллап қуввәтлиши вә даириләр билән һәмкарлишип «қара гуруһ» вә «рәзил күчләр» гә аит йип учи билән тәминлиши керәкликини билдүргән. Уқтурушта учур бәргүчиләрниң әң юқири болғанда 100 миң йүән билән мукапатлинидиғанлиқи әскәртилгән.

Уқтурушта 13 парчә картон рәсими арқилиқ қандақ иш-һәрикәтләр вә кишиләрниң «җинайи рәзил күчләрниң һәрикити» категорийәсигә киридиғанлиқи шәрһләнгән болуп, булар: «миллий бөлгүнчилик, диний әсәбийлик вә террорлуқ билән шуғуллинидиған тәшкилатлар вә җамаәтләр, асаси қатламға суқунуп кирип, уни монопол қиливалғанлар, юртдашлиқ, туғқанчилиқ, диндашлиқ риштиси бойичә гуруһ уюштурғанлар, йәр тәқсимати, йәр иҗаригә бериш, өй чеқиш вә қурулуш түрлиридә қутратқулуқ қилғанлар, бөлгүнчи, диний әсәбий күчләрни қанат астиға алған ‹икки йүзлимичи кадирлар', чәтәлдики ‹қара гуруһ вә рәзил күчләр' билән алақиси барлар, башқиларни әрз қилишқа қутратқанлар, қанунсиз пул топлиғанлар, тор арқилиқ башқиларға төһмәт вә тәһдит қилғанлар» қатарлиқларни өз ичигә алидикән.

Чәтәлләрдики уйғур көзәткүчиләрниң илгири сүрүшичә, уқтурушта бу һәрикәтниң «қара гуруһлар» вә «рәзил күчләр» гә қаритилғанлиқи тәкитләнгән болсиму, лекин униңдики асаслиқ тазилаш нишаниниң йәнила уйғурлар икән.

Улар хитай һөкүмити 2 милйондәк гунаһсиз уйғур, қазақ вә башқиларни йиғивелиш лагери вә түрмиләрдә тутуп турғандин сирт, лагер сиртида қелип қалған уйғурларниму мана мушу хил усуллар билән җазалап, пүткүл уйғур районини үсти очуқ түрмигә айландурғанлиқини билдүрмәктә.

Бу 2-айда йеңисар наһийәсиму юқиридики «қара гуруһлар» вә «рәзил күчләр» гә қарши омумий йүзлүк тазилаш һәрикити қозғаш һәққидә уқтуруш чиқарған иди.

Пикирләр (0)
Share
Толуқ бәт