Bayin'gholin oblasti atalmish "Qara guruhlar" we "Rezil küchler" ge qarshi omumiy yüzlük tazilash herikiti qozghighan

Muxbirimiz irade
2019-03-01
Élxet
Pikir
Share
Print

Bayin'gholin oblasti yéqinda atalmish "Qara guruhlar" we "Rezil küchler" ge qarshi omumiy yüzlük tazilash herikiti qozghighan.

Bayin'gholin oblasti bu heqte élan qilghan uqturushida mezkur heriketni xelqning qollap quwwetlishi we da'iriler bilen hemkarliship "Qara guruh" we "Rezil küchler" ge a'it yip uchi bilen teminlishi kéreklikini bildürgen. Uqturushta uchur bergüchilerning eng yuqiri bolghanda 100 ming yüen bilen mukapatlinidighanliqi eskertilgen.

Uqturushta 13 parche karton resimi arqiliq qandaq ish-heriketler we kishilerning "Jinayi rezil küchlerning herikiti" katégoriyesige kiridighanliqi sherhlen'gen bolup, bular: "Milliy bölgünchilik, diniy esebiylik we térrorluq bilen shughullinidighan teshkilatlar we jama'etler, asasi qatlamgha suqunup kirip, uni monopol qiliwalghanlar, yurtdashliq, tughqanchiliq, dindashliq rishtisi boyiche guruh uyushturghanlar, yer teqsimati, yer ijarige bérish, öy chéqish we qurulush türliride qutratquluq qilghanlar, bölgünchi, diniy esebiy küchlerni qanat astigha alghan 'ikki yüzlimichi kadirlar', chet'eldiki 'qara guruh we rezil küchler' bilen alaqisi barlar, bashqilarni erz qilishqa qutratqanlar, qanunsiz pul toplighanlar, tor arqiliq bashqilargha töhmet we tehdit qilghanlar" qatarliqlarni öz ichige alidiken.

Chet'ellerdiki Uyghur közetküchilerning ilgiri sürüshiche, uqturushta bu heriketning "Qara guruhlar" we "Rezil küchler" ge qaritilghanliqi tekitlen'gen bolsimu, lékin uningdiki asasliq tazilash nishanining yenila Uyghurlar iken.

Ular xitay hökümiti 2 milyondek gunahsiz Uyghur, qazaq we bashqilarni yighiwélish lagéri we türmilerde tutup turghandin sirt, lagér sirtida qélip qalghan Uyghurlarnimu mana mushu xil usullar bilen jazalap, pütkül Uyghur rayonini üsti ochuq türmige aylandurghanliqini bildürmekte.

Bu 2-ayda yéngisar nahiyesimu yuqiridiki "Qara guruhlar" we "Rezil küchler" ge qarshi omumiy yüzlük tazilash herikiti qozghash heqqide uqturush chiqarghan idi.

Toluq bet