Уйғурларни хорлашқа четилған “қара тизимлик” тики хитай ширкәтлири америка базириға васитилик кирмәктикән

Америкадики хәлқара тәкшүрүш ахбаратчилар бирләшмиси америка сода министирлиқиниң “қара тизимлики” гә елинған уйғур районидики кишилик һоқуқ дәпсәндичиликигә четишлиқ хитай ширкәтлириниң америка базириға васитилик кириватқанлиқини агаһландурди.

Америка сода министирлиқи өткән йили 10-айда уйғур районидики 20 дәк хитай дөләт аппарати вә хәйкаң, дахуа қатарлиқ 8 хитай ширкитини “қара тизимлик” кә алған иди. Өткән һәптә йәнә 8 хитай ширкити билән бир хитай дөләт аппарати бу тизимликкә киргүзүлгән иди.

Лекин хәлқара тәкшүрүш ахбаратчилар бирләшмисиниң 28-май елан қилған доклатида көрситилишичә, “қара тизимлик” тики бәзи ширкәтләр чәклимини бузуп ташлап, давамлиқ америка базириға кирмәктә икән. Мәзкур доклатта хитайниң хәйкаң вә дахуа ширкәтлири ишләпчиқарған көзитиш аппаратлириниң һазирму амазонда сетиливатқанлиқи, америка һөкүмити йолға қойған чәкләш тәдбирлириниң дегәндәк үнүмлүк болмайватқанлиқи илгири сүрүлгән. Хәлқара тәкшүрүш ахбаратчилар бирләшмисиниң тәкитлишичә, “қара тизимлик” тики бәзи ширкәтләр буниңда өзлириниң америкадики тармақ ширкәтлирини ишқа салмақта икән.

Доклатта йәнә амазон вә микрософт ширкәтлириниң техи йеқиндила “қара тизимлик” тики бәзи хитай ширкәтлирини һалқилиқ тор мулазимити билән тәминлигәнлики илгири сүрүлгән. Доклатта көрситилишичә, америкалиқ уйғуршунас дәррин байлер америка сода министирлиқиниң тизимликидә 3-тәрәпниң ениқ тәрипләнмигәнлики, буниң “қара тизимлик” тики ширкәтләрниң мәһсулатлирини америка тор базирида сетишиға йол ечип бәргәнликини билдүргән.