Uyghurlarni xorlashqa chétilghan “Qara tizimlik” tiki xitay shirketliri amérika bazirigha wasitilik kirmektiken

Amérikadiki xelq'ara tekshürüsh axbaratchilar birleshmisi amérika soda ministirliqining “Qara tizimliki” ge élin'ghan Uyghur rayonidiki kishilik hoquq depsendichilikige chétishliq xitay shirketlirining amérika bazirigha wasitilik kiriwatqanliqini agahlandurdi.

Amérika soda ministirliqi ötken yili 10-ayda Uyghur rayonidiki 20 dek xitay dölet apparati we xeykang, daxu'a qatarliq 8 xitay shirkitini “Qara tizimlik” ke alghan idi. Ötken hepte yene 8 xitay shirkiti bilen bir xitay dölet apparati bu tizimlikke kirgüzülgen idi.

Lékin xelq'ara tekshürüsh axbaratchilar birleshmisining 28-may élan qilghan doklatida körsitilishiche, “Qara tizimlik” tiki bezi shirketler cheklimini buzup tashlap, dawamliq amérika bazirigha kirmekte iken. Mezkur doklatta xitayning xeykang we daxu'a shirketliri ishlepchiqarghan közitish apparatlirining hazirmu amazonda sétiliwatqanliqi, amérika hökümiti yolgha qoyghan cheklesh tedbirlirining dégendek ünümlük bolmaywatqanliqi ilgiri sürülgen. Xelq'ara tekshürüsh axbaratchilar birleshmisining tekitlishiche, “Qara tizimlik” tiki bezi shirketler buningda özlirining amérikadiki tarmaq shirketlirini ishqa salmaqta iken.

Doklatta yene amazon we mikrosoft shirketlirining téxi yéqindila “Qara tizimlik” tiki bezi xitay shirketlirini halqiliq tor mulazimiti bilen teminligenliki ilgiri sürülgen. Doklatta körsitilishiche, amérikaliq Uyghurshunas derrin baylér amérika soda ministirliqining tizimlikide 3-terepning éniq teriplenmigenliki, buning “Qara tizimlik” tiki shirketlerning mehsulatlirini amérika tor bazirida sétishigha yol échip bergenlikini bildürgen.