Qaraqash nahiyesining bir kentide 16 zawut qurulup, Uyghurlarning ishlitiliwatqanliqi melum

Muxbirimiz irade
2020-12-17
Share

Xitay hökümitining Uyghurlarni erzan bahaliq qul emgekchilirige aylanduruwatqanliqi xitay özi tarqatqan xewerlerdimu ashkarilanmaqta.

"Xitay xewerler tori" 17-dékabir élan qilghan bir xewiride, qaraqash nahiyesining peqet bir kentidila 16 karxana qurulghanliqini, ilgiri öz aldigha xususiy tijaret bilen shughullinidighan, déhqanchiliq qilidighan yaki höner-kesp bilen shughullinidighan déhqanlarning hazir bu zawutlarda muqim ma'ashliq ishchilargha aylan'ghanliqini tentene bilen bayan qilghan. Xewerde qaraqash nahiyesining uzun'ériq kentining ahalililiri yuqiriqi bu zawutlarda ishqa orunliship "Tatliq hayatqa érishti" diyilgen.

Sewebi bu kenttiki ahaliler bir-birige gireleshken kempüt pishshiqlap ishlesh zawuti, péchine-pirenik zawuti we sherbet zawuti qatarliq tatliq yémeklik sana'itide xizmet qildurulmaqtiken.

"Xitay xewerler tori" ning xewiride uzun'ériq kentining eslide intayin namratliqini, emma bu karxanilarning kélishi bilen bu kentning "Yerliktiki dangliq ishqa orunlishish kenti" ge aylan'ghanliqini ilgiri sürgen.

Halbuki, xitay hökümiti dewatqan "Ishik aldida ishqa orunlishish", "Muqim xizmetke ériship, turmushi kapaletke ige bolush" dep teriplewatqan heriketlirining hemmisining emeliyette Uyghurlarni erzan bahaliq qul emgekchilerge aylandurush teshebbusi ikenliki, qoramigha yetkenler, yashan'ghanlar we lagérlardin qoyup bérilgenlerningmu emeliyette mushu xil zawutlarda qul emgikige séliniwatqanliqi, ularning xalighan waqitta öyige qaytalmaydighanliqi, xalighan jaygha baralmaydighanliqi delil-ispatliri bilen xelq'aragha keng ashkarilanmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet