Мутәхәссис адрян зенз: «‹қайта тәрбийә' һәрикити хитай өлкилиригиму йейилиши мумкин»

Мухбиримиз шөһрәт һошур
2018-08-08
Елхәт
Пикир
Share
Принт

Германийәлик тәтқиқатчи адрян зенз уйғур аптоном районида йолға қоюлуватқан иҗтимаий инавәт бихәтәрлик системисиниң, йәни һәр бир кишигә бихәтәрлик җәһәттин номур қоюш түзүминиң пат арида хитай өлкилиригиму кеңийиш еһтималлиқини оттуриға қойди. У америкида чиқидиған «ташқи ишлар» журнилиниң бу айлиқ санида «‹қайта тәрбийә' ниң хитайға қайтиши» намлиқ мақалисидә бу түзүмниң омумлишиши билән нөвәттә уйғур районида мәвҗут болуп туруватқан йиғивелиш лагерлириниң бәлгилик даиридә вә бәлгилик муддәттә хитай өлкилиридиму тәсис қилиниш еһтималлиқини илгири сүрди.

Униң баян қилишичә, хитайда йеқинқи йилларда буддизм вә тәриқәтчилик қатарлиқ хитайларниң әнәниви мәдәнийити сиңгән йәрлик диний әқидилири аста-аста баш көтүргән, христиан муритлириниң сани хитайдики компартийә әзалиридин ешип кәткән. Бу һал хитай компартийисидә җиддий әндишә пәйда қилған. Шуңа хитай һөкүмити йеқинқи йиғинлирида хитайдики йәрлик диний әқидиләрни хитайчилаштуруш чақириқини оттуриға қоймақтикән. 

Адрян зенз йәнә мақалисидә хитай компартийисиниң илгири иқтисадий турмуш йүксәлгәнсери кишиләр диндин узақлишип маңиду дәп қариғанлиқини, әмма реаллиқниң ундақ болмиғанлиқини, шуңа ши җинпиңниң асасий нуқтини идеологийә саһәсигә мәркәзлишиватқанлиқини тәкитлигән. 

У хитайдики йәрлик динларниң «мәдәнийәт инқилаби» диму йоқалмиғанлиқини, һазир уйғур аптоном районида елип бериливатқан лагердики «сиясий тәрбийә» ниң уйғурларда хитайға қарита садақәт йетилдүргәнликигә аит һечқандақ бир аламәтниң йоқлуқини пакит қилип көрсәткән. У йәнә мақалисидә номурлуқ бихәтәрлик түзүми хитай өлкилиридә йолға қоюлған тәқдирдиму хитайниң күткән нәтиҗигә еришәлмәйдиғанлиқини баян қилған.

Пикирләр (0)
Share
Толуқ бәт