Mutexessis adryan zénz: "'qayta terbiye' herikiti xitay ölkilirigimu yéyilishi mumkin"

Muxbirimiz shöhret hoshur
2018-08-08
Élxet
Pikir
Share
Print

Gérmaniyelik tetqiqatchi adryan zénz Uyghur aptonom rayonida yolgha qoyuluwatqan ijtima'iy inawet bixeterlik sistémisining, yeni her bir kishige bixeterlik jehettin nomur qoyush tüzümining pat arida xitay ölkilirigimu kéngiyish éhtimalliqini otturigha qoydi. U amérikida chiqidighan "Tashqi ishlar" zhurnilining bu ayliq sanida "'qayta terbiye' ning xitaygha qaytishi" namliq maqaliside bu tüzümning omumlishishi bilen nöwette Uyghur rayonida mewjut bolup turuwatqan yighiwélish lagérlirining belgilik da'iride we belgilik muddette xitay ölkiliridimu tesis qilinish éhtimalliqini ilgiri sürdi.

Uning bayan qilishiche, xitayda yéqinqi yillarda buddizm we teriqetchilik qatarliq xitaylarning en'eniwi medeniyiti singgen yerlik diniy eqidiliri asta-asta bash kötürgen, xristi'an muritlirining sani xitaydiki kompartiye ezaliridin éship ketken. Bu hal xitay kompartiyiside jiddiy endishe peyda qilghan. Shunga xitay hökümiti yéqinqi yighinlirida xitaydiki yerlik diniy eqidilerni xitaychilashturush chaqiriqini otturigha qoymaqtiken. 

Adryan zénz yene maqaliside xitay kompartiyisining ilgiri iqtisadiy turmush yükselgenséri kishiler dindin uzaqliship mangidu dep qarighanliqini, emma ré'alliqning undaq bolmighanliqini, shunga shi jinpingning asasiy nuqtini idé'ologiye sahesige merkezlishiwatqanliqini tekitligen. 

U xitaydiki yerlik dinlarning "Medeniyet inqilabi" dimu yoqalmighanliqini, hazir Uyghur aptonom rayonida élip bériliwatqan lagérdiki "Siyasiy terbiye" ning Uyghurlarda xitaygha qarita sadaqet yétildürgenlikige a'it héchqandaq bir alametning yoqluqini pakit qilip körsetken. U yene maqaliside nomurluq bixeterlik tüzümi xitay ölkiliride yolgha qoyulghan teqdirdimu xitayning kütken netijige érishelmeydighanliqini bayan qilghan.

Toluq bet