Хәлқара кәчүрүм тәшкилати сәуди әрәбистанни икки уйғурни хитайға өткүзүп бәрмәсликкә чақирди

Мухбиримиз ирадә
2022-03-24
Share

2020-Йили 11-айда сәуди әрәбистанда сәвәбсиз тутқун қилинип җиддә шәһиридики түрмидә йетиватқан һәмдулла вәли билән нурмуһәммәт розиниң алдинқи һәптә пайтәхт риядтики түрмигә йөткилиши уларниң хитайға қайтурулуши мумкинлики һәққидики әндишиләрни йәниму күчәйтти.

Хәлқара кәчүрүм тәшкилати 23-март күни бу мунасивәт билән сәуди әрәбистан һөкүмитигә җиддий чақириқ елан қилип, һәмдулла вәли билән нурмуһәммәт розини хитайға қайтурмаслиқни тәләп қилди.

23-Март күни елан қилинған баянатта мундақ дейилгән: “сәуди әрәбистан даирилири бу икки уйғурни хитайға тапшуруп бериш пиланини тохтитиши керәк, хитай һөкүмити мусулман аз санлиқ милләтләргә рәһимсизләрчә бастуруш сиясити қоллиниватқан бу җайда уларниң қейин-қистаққа дуч келиш хәвпи интайин еғир”.

Хәлқара кәчүрүм тәшкилатиниң оттура шәрқ вә шималий африқа райониниң муавин мудири лин маалоф баянаттики сөзидә “бу кишиләр әгәр хитайға әвәтилсә уларниң җаза лагерлири яки түрмиләргә қамилиши вә қийин-қистаққа елиниши мумкинлики” ни әскәртип: “хәлқара қанунларға асасән, сәуди әрәбистан һөкүмитиниң қийин-қистаққа учраш хәвпи сәвәбидин һәмдулла вәли вә нурмуһәммәд розиларни хитайға тапшуруп бәрмәслик мәҗбурийити бар. Сәуди әрәбистан даирилири уларни хитайға қайтуруп бериш пиланини бикар қилиши вә уларни түрмидин дәрһал азад қилиши керәк” дегән.

Һәмдулла вәли билән нурмуһәммәт розиниң хитайға өткүзүп берилиш хәвпи хәлқара кишилик һоқуқ органлириниң изчил әндишисини қозғап кәлгән. Болупму алдинқи һәптә сәуди әрәбистан даирилириниң җиддә шәһиридики әл-даһбан түрмисидә тутуп турулуватқан бу икки уйғурни пайтәхт риядқа йөткәп әкәлгәнлики һәққидә хәвәрләр тарқалғандин кейин әндишә йәниму күчәйгәниди.

Уларниң аилә-тавабиатлири хәлқара кәчүрүм тәшкилатиға қилған сөзлиридә бу иккисиниң 16-март күни риядқа йөткәп кетилишиниң уларниң хитайға қайтурулидиғанлиқидин дерәк беридиғанлиқини ейтип хәлқара җәмийәттин ярдәм тәләп қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт