Xelq'ara kechürüm teshkilati se'udi erebistanni ikki Uyghurni xitaygha ötküzüp bermeslikke chaqirdi

Muxbirimiz irade
2022.03.24
Share on WhatsApp
Share on WhatsApp

2020-Yili 11-ayda se'udi erebistanda sewebsiz tutqun qilinip jidde shehiridiki türmide yétiwatqan hemdulla weli bilen nurmuhemmet rozining aldinqi hepte paytext riyadtiki türmige yötkilishi ularning xitaygha qayturulushi mumkinliki heqqidiki endishilerni yenimu kücheytti.

Xelq'ara kechürüm teshkilati 23-mart küni bu munasiwet bilen se'udi erebistan hökümitige jiddiy chaqiriq élan qilip, hemdulla weli bilen nurmuhemmet rozini xitaygha qayturmasliqni telep qildi.

23-Mart küni élan qilin'ghan bayanatta mundaq déyilgen: “Se'udi erebistan da'iriliri bu ikki Uyghurni xitaygha tapshurup bérish pilanini toxtitishi kérek, xitay hökümiti musulman az sanliq milletlerge rehimsizlerche basturush siyasiti qolliniwatqan bu jayda ularning qéyin-qistaqqa duch kélish xewpi intayin éghir”.

Xelq'ara kechürüm teshkilatining ottura sherq we shimaliy afriqa rayonining mu'awin mudiri lin ma'alof bayanattiki sözide “Bu kishiler eger xitaygha ewetilse ularning jaza lagérliri yaki türmilerge qamilishi we qiyin-qistaqqa élinishi mumkinliki” ni eskertip: “Xelq'ara qanunlargha asasen, se'udi erebistan hökümitining qiyin-qistaqqa uchrash xewpi sewebidin hemdulla weli we nurmuhemmed rozilarni xitaygha tapshurup bermeslik mejburiyiti bar. Se'udi erebistan da'iriliri ularni xitaygha qayturup bérish pilanini bikar qilishi we ularni türmidin derhal azad qilishi kérek” dégen.

Hemdulla weli bilen nurmuhemmet rozining xitaygha ötküzüp bérilish xewpi xelq'ara kishilik hoquq organlirining izchil endishisini qozghap kelgen. Bolupmu aldinqi hepte se'udi erebistan da'irilirining jidde shehiridiki el-dahban türmiside tutup turuluwatqan bu ikki Uyghurni paytext riyadqa yötkep ekelgenliki heqqide xewerler tarqalghandin kéyin endishe yenimu kücheygenidi.

Ularning a'ile-tawabi'atliri xelq'ara kechürüm teshkilatigha qilghan sözliride bu ikkisining 16-mart küni riyadqa yötkep kétilishining ularning xitaygha qayturulidighanliqidin dérek béridighanliqini éytip xelq'ara jem'iyettin yardem telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.